कोपा अमेरिकाको फाइनल भिडन्त चिली र अर्जेन्टिनाबीच

काठमाडौ – कोलम्बियालाई पराजित गर्दै चिली कोपा अमेरिकाको फाइनलमा प्रवेश गरेको छ । अमेरिकाको शिकागोमा बिहीबार बिहान भएको दोस्रो सेमिफाइनलमा चिली २–० ले विजयी भयो ।

खेलमा चिलीलाई विजयी गराउन चाल्र्स अरान्ग्वेज र होजे फ्युन्दालिजाले पहिलो हाफमै एक–एक गोल गरे । दोस्रो हाफ सुरु हुनुपूर्व भने खराब मौसमका कारण खेल अढाई घण्टासम्म रोकिएको थियो । दोस्रो हाफमा कोलम्बियाले खेलमा फर्कने थुप्रै प्रयास गरे पनि गोल गर्न भने सकेन ।

५७ औं मिनेटमा कार्लोस सान्चेज दोहोरो पहेँलो कार्ड खाँदै मैदानबाट बाहिरीएपछि कोलम्बिया १० जनामा समेटियो । यो जितसँगै चिलीले सोमबार बिहान हुने फाइनल खेलमा अर्जेन्टिना विरुद्धको उपाध भिडन्त तय गरेको छ ।

बुधवार भएको पहिलो सेमिफाइनलमा आयोजक अमेरिकालाई ४–० ले हराउँदै अर्जेन्टिना फाइनलमा पुगेको हो ।