काठमाडौँ – सरकारले अफगानिस्तानको काबुलमा भएको आत्मघाती आक्रमणमा मारिएका नेपालीको शव ल्याउन विमान पठाएको छ । आज बिहान साढे ३ बजे विशेष विमानसहित काबुल गएको टोलीले आजै शव नेपाल ल्याउने छ ।
नेपाल वायु सेवा निगमको एयर बस चार्टर गरी परराष्ट्रको नेतृत्वमा नेपाली सेना र नेपाल प्रहरीको विशेष ब्युरोका अधिकारीसहितको टोली काबुल पठाएको हो । टोली काबुल पुगेर बिहान करिब ७ बजे फर्कने कार्यतालिका रहेको श्रम मन्त्रालयका प्रवक्ता गोविन्दमणि भुर्तेलले जानकारी दिनुभयो । परराष्ट्र मन्त्रालयले विमानको क्षमताले भ्याएसम्म अफगानिस्तानमा रहेका स्वदेश आउन इच्छुक नेपालीलाई ल्याउने जनाएको छ । मन्त्रालयका अनुसार निगमको ठुलो विमान चार्टर गरेकाले त्यसमा १२ शवसँगै घाइते र नेपाल आउन इच्छुक नेपाली कामदारलाई समेत ल्याउन सकिने जनाएको छ । 
गृह प्रवक्ता सहसचिव यादवप्रसाद कोइरालाका अनुसार परराष्ट्र मन्त्रालयका सहसचिव प्रकाश सुवेदी र गृहका महेश दाहालसहित वैदेशिक रोजगार प्रर्वद्धन विभाग र पर्यटन मन्त्रालयका एकएकजना प्रतिनिधि टोलीमा रहेका छन् । नेपाली सेनाका दुईजना चिकित्सक, एक जना पारामेडिकल अफिसर र एक जना एयर लाईजन अफिसर टोलीमा रहेका छन्। यस्तै विशेष ब्युरोका एसपी सुदिप गिरीको नेतृत्वमा एक जना डिएसपी र एक जना नायव निरीक्षक टोलीमा छन् ।
अफगानिस्तानको राजधानी काबुलमा सोमबार बिहान भएको आत्मघाती बम आक्रमणमा १२ नेपाली सहित १४ जनाको मृत्यु भएको थियो । घटनाको प्रभावकारी खोज तथा उद्धारका लागि परराष्ट्र मन्त्रालयले पाकिस्तानस्थित नेपाली दूतावासका कार्यवहाक राजदूतलाई सोमबार नै अफगानिस्तान पठाइसकेको छ । घटनामा ७ नेपाली घाइते भएका छन् ।
