काठमाडौँ – अफगानिस्तानको काबुलमा अति सुरक्षित स्थानमा छ क्यानेडेली दूतावास । यही दूतावासको बाहिरी सुरक्षामा हुन्छन् नेपाली युवा । उनीहरूलाई दूतावासले सिधा होइन डायनकर्प इन्टरनेशनलबाट सुरक्षाका लागि भर्ती गर्ने गर्छ ।
दूतावासको सुरक्षाका लागि काम गरे पनि नेपाली युवा दूतावासको सुरक्षित स्थानमा भने बसोबास गर्दैनन् । उनीहरूलाई डायनकर्पले काबुल जलालाबाद हाइवेको नजिकै पर्ने पीडि ९ को बनाया क्षेत्रमा बसोबासको व्यवस्था मिलाएको छ । अरू दिनजस्तो सोमबार बिहानै दूतावासको सुरक्षामा खटिने नेपाली टोली काबुलको क्यानेडेली दूतावास जान तयार भए । उनीहरू सुनौलो र सेतो रङको मिनी बसमा चढेर काबुल जाँदै थिए ।
बस नेपालीहरू बस्ने स्थानबाट काबुल जालालाबादको मुख्य सडकमा छिर्यो । बस अफगानिस्तानको समयअनुसार बिहान ५ बजेर ४० मिनेट जाँदा मुख्य सडकमा प्रवेशमात्रै गरेको थियो, ठुलो आवाजसहित विस्फोटनमा पर्यो । बसलाई पैदलै आएका आत्मघाती आक्रमणकारीले हमला गरेको काबुलका प्रहरी प्रमुख जनरल अब्दुर रहरमान रहिमीले जानकारी दिनुभयो । यही हमालामा १२ नेपालीको मृत्यु भयो भने ६ नेपाली घाइते भए।
विस्फोटनमा परेर दुई भारतीयको समेत मृत्यु भएको छ भने चार अफगानी पनि घाइते भएको अफगानिस्तानको गृह मन्त्रालयले प्रेस विज्ञप्ति जारी गरेर जानकारी दिएको आजको गोरखापत्र दैनिकमा खबर छ । यसअघि २०६१ भदौमा पनि इराकमा पुगेका १२ नेपालीको अपहरण गरी आतंककारीले निर्मम हत्या गरेका थिए ।
विस्फोटनमा परी मृत्यु हुने नेपाली आफ्नो दूतावासको सुरक्षाका लागि काम गरिरहेको जानकारी काबुलस्थित क्यानडाली दूतावासले दिएको छ ।
