काठमाडौँ – पूर्वराष्ट्रपति डा. रामवरण यादवलाई डेराबाट निकाल्न माग गर्दै ललितपुर जिल्ला अदालतमा निवेदन परेको छ । सरकारले घर बहालबापत मासिक एक लाख ३० हजार रुपैयाँको दरले सात महिनाको भाडा नबुझाएको भन्दै घरधनी रविभक्त विष्टले मुद्दा दायर गर्नुभएको हो ।
निवेदनमा विष्टले राष्ट्रपति कार्यालय र प्रधानमन्त्री कार्यालयलाई विपक्षी बनाउनुभएको छ । उहाँले हालसम्म बक्यौता रहेको रकम भराइपाउँ भन्दै निवेदन दिएको ललितपुर जिल्ला अदालतले जनाएको छ । विद्यादेवी भण्डारी राष्ट्रपतिमा निर्वाचित भएपछि यादवलाई गत कात्तिक १२ गतेदेखि विष्टको घरमा मासिक १ लाख ३० हजार रुपैयाँ भाडामा सारिएको थियो । त्यसयताको भाडा सरकारले तिरेको छैन् ।
मन्त्रिपरिषदले गत चैत २६ मा यादव बस्दै आएको घरको भाडा राष्ट्रपति कार्यालयमार्फत भुक्तानी गर्ने निर्णय गरे पनि विष्टले त्यो नपाएको गुनासो निवेदनमा गर्नुभएको छ । विष्ट पन्ध्र दिनअगाडि निवेदन लिएर ललितपुर जिल्ला अदालत पुगेका थिए । श्रेस्तेदार बाबुराम दाहालले सरकारले घर बहालमा दिएको करार सम्झौता नदेखिएकाले अदालतले हेर्न नमिल्दै भन्दै निवेदन दरपीठ गर्नुभएको आजको अन्नपूर्ण पोस्ट दैनिकमा खबर छ ।
विष्टले शुक्रवार पुनः अदालत गएर इजलासमै निवेदन दिनुभएको छ ।
