काठमाडौं – राष्ट्रिय प्रजातन्त्र पार्टी (राप्रपा) की केन्द्रीय सदस्य एवं चर्चित अभिनेत्री रेखा थापाले अध्यक्ष राजेन्द्र लिङ्देनलाई पुरानो गल्तीको स्मरण गराउँदै पुनः अर्को ठूलो गल्ती गरेको आरोप लगाएकी छिन् ।
पार्टीको केन्द्रीय समिति बैठकमा बोल्दै उनले महामन्त्री धवलशम्शेर राणाको स्वास्थ्य अवस्थालाई बेवास्ता गर्दै उनलाई संगठन विभाग प्रमुखबाट हटाइएको घटनालाई गलत कदम भनेकी छन् । उनले भनिन्, ‘महामन्त्री धवलशम्शेर राणा क्यान्सरजस्तो गम्भीर रोगसँग जुधिरहेको बेला उनलाई पदबाट हटाउनु दुर्भाग्यपूर्ण हो ।’
उनले आफूलाई लक्षित गर्दै लिङ्देनले विगतमा दिएको अभिव्यक्तिको पनि पुनः स्मरण गरिन् । उनले भनिन्, ‘म बच्चा जन्माउन अमेरिका गएको बेला अध्यक्ष लिङ्देनबाट आएको अभिव्यक्ति दुखद थियो । तर, मैले यसलाई मनमा लिएको छैन ।’
गत वर्ष लिङ्देनले नाम नलिईकन एक ‘चर्चित कलाकार’को अमेरिकामा बच्चा जन्माउने निर्णयमाथि टिप्पणी गरेका थिए । उनले भनेका थिए, ‘महिला जीवनमा पहिलो सन्तानलाई नेपाली बनाउन नचाहने कुरा राष्ट्रियताको लागि सोचनीय छ ।’
यसले त्यसबेला व्यापक विवाद निम्त्याएको थियो । रेखाले त्यतिबेला लिङ्देनलाई जवाफ दिँदै उनकी छोरी पनि अमेरिका पठाइएको तथ्य प्रस्तुत गरेकी थिइन् । हालैको बैठकमा पुनः उक्त विषय उठाउँदै रेखाले पार्टी नेतृत्वको कार्यशैलीप्रति प्रश्न उठाइन् ।
रेखाले महामन्त्री राणाद्वारा प्रस्तुत गरिएको राजनीतिक प्रतिवेदनको समर्थन गर्दै पार्टीमा देखिएको चुनौती र समस्याबारे गम्भीर ध्यानाकर्षण गराइन् । ‘पार्टीलाई वैकल्पिक शक्ति बनाउने भनिए पनि जनमत घट्दो क्रममा छ। यसबारे गम्भीर समीक्षा हुनुपर्छ,’ उनले भनिन् ।
