नेप्से परिसूचक दोहोरो अङ्कले घट्यो

समाचार सुन्नुहोस : 

काठमाडौँ – साताको पहिलो कारोबार दिन अर्थात् आइतबार नेप्से परिसूचक घटेर बन्द भएको छ। अघिल्लो कारोबार दिन बिहीबार पनि घटेर बन्द भएको नेप्से आज पनि सोही क्रमलाई निरन्तरता दिएको छ।

आजको कारोबारमा नेप्से परिसूचक १०.४१ अंक घटेर २६४३.९३ विन्दुमा पुग्यो। यस्तै, सेन्सेटिभ इण्डेक्स ३.२० अंक घटेको छ भने फ्लोट इण्डेक्स ०.७४ अंक र सेन्सेटिभ फ्लोट इण्डेक्स ०.८८ अंक घटेका छन्।

नेप्से घटेको भए पनि आजको कारोबार रकम बढेको छ। गत कारोबार दिनको ७ अर्ब ८५ करोडको कारोबारका तुलनामा आज ९ अर्ब १२ करोड ८६ लाख ७३ हजार रुपैयाँबराबरको सेयर कारोबार भएको छ। ३१८ स्टकमा ९४ हजार ८१३ पटकको कारोबारमा १ करोड ५७ लाख २० हजार कित्ता सेयर खरिदबिक्री गरिएको छ।