विदेश अध्ययनका लागि पाँच महिनामा ४७ अर्ब ३४ करोड खर्च

समाचार सुन्नुहोस : 

काठमाडौँ – देशभित्र सुविधासम्पन्न विश्वविद्यालय र शिक्षण संस्थाहरूको व्यवस्था भए तापनि विदेशमा अध्ययन गर्न जाने नेपाली विद्यार्थीहरूको सङ्ख्या निरन्तर बढिरहेको छ। नेपाल राष्ट्र बैंकको पछिल्लो तथ्यांकअनुसार चालु आर्थिक वर्षका पहिलो पाँच महिनामा मात्र नेपाली विद्यार्थीहरूले विदेशी शैक्षिक कार्यक्रमका लागि ४७ अर्ब ३४ करोड खर्च गरेका छन्। त्यस्तै भ्रमण खर्च पनि १२.२ प्रतिशतले बढेर ८५ अर्ब १ करोड पुगेको छ। अघिल्लो वर्षको यही अवधिमा भ्रमण खर्च ७५ अर्ब ७३ करोड थियो।

गएको मङ्सिर मसान्तसम्म नेपालको खुद सेवा आयमा ४० अर्ब ७१ करोडको घाटा भएको छ। अघिल्लो वर्ष यो घाटा २६ अर्ब ५५ करोड थियो। यस अवधिमा भ्रमण आय तीन प्रतिशतले बढेर ३५ अर्ब १९ करोड पुगेको छ। जबकि अघिल्लो वर्ष यो आय ३४ अर्ब १२ करोड थियो।