टोकियो – जापान छन्त्याल संघले टोकियोमा एक विशेष कार्यक्रमको आयोजना गरी माघे संक्रान्ति (छार म्हेङ) पर्व उल्लासमय रूपमा मनाएको छ । छार म्हेङबाटै छन्त्यालहरूको नयाँ वर्ष सुरु हुने चलन रहेकाले यो पर्वलाई उल्लासमय रूपमा मनाइएको हो ।
संघका अध्यक्ष गंगबहादुर छन्त्याल र वरिष्ठ सल्लाहकार जोन छन्त्यालले छन्त्यालहरूको १२ थरमा संयुक्त रूपमा दीप प्रज्वलन गरी कार्यक्रमको उद्घाटन गरेका थिए । सो अवसरमा बोल्दै जापान छन्त्याल संघका वरिष्ठ सल्लाहकार जोन छन्त्यालले छन्त्यालहरूको थर अझै पनि कतिपयलाई थाहा नभएकाले यसलाई प्रचारप्रसार गर्न जरुरी रहेको बताए । छन्त्यालहरूको रीतिरिवाजलाई भुल्न नहुनेमा उनको जोड् छ ।
संघका अध्यक्ष गंगबहादुरले जुन ठाउँमा रहेपनि हाम्रो भाषा संस्कृति रीतिरिवाजलाई भुल्न नहुने बताए । ‘हामी जुनसुकै भूगोलमा भए पनि हाम्रो पहिचान हाम्रो भाषा र संस्कृतिमा अडिएको छ,’ उनले भने, ‘यसलाई जगेर्ना गर्न सबैको जिम्मेवारी हो ।’
सो अवसरमा विविध सांस्कृतिक प्रस्तुति पनि रहेको थियो । छन्त्याल समुदायका परम्परागत नृत्य, गीत र भेषभूषाले कार्यक्रममा उपस्थित सबैलाई मन्त्रमुग्ध बनाएको थियो ।
माघे संक्रान्ति (छार म्हेङ) पर्व छन्त्यालहरूको विशेष महत्त्व बोकेको चाड हो । देश विदेशमा छन्त्यालहरूले यो चाडलाई विशेष चाडको रूपमा मनाउने गरिन्छ । पर्व विशेषमा गरिने यस्ता कार्यक्रमहरूले विदेशमा पनि नेपाली संस्कृति र परम्पराको संरक्षणमा महत्त्वपूर्ण योगदान पुग्ने आम बुझाई रहेको पाईन्छ । ***
