समाचार सुन्नुहोस :
काठमाडौँ – नेपाल कम्युनिष्ट पार्टी (माओवादी केन्द्र) को केन्द्रीय समितिको बैठक आजदेखि सुरू हुने भएको छ। बैठक पार्टीको केन्द्रीय कार्यालय पेरिसडाँडामा अपराह्न १ बजे बस्नेछ। बैठकमा अध्यक्ष पुष्पकमल दाहाल ‘प्रचण्ड’ ले राजनीतिक तथा सांगठनिक प्रतिवेदन पेस गर्नेछन्, जसमा छलफल हुने कार्यक्रम रहेको छ। पार्टी उपाध्यक्ष एवं प्रवक्ता अग्नि सापकोटाका अनुसार, यसअघि स्थायी समिति बैठकले अध्यक्ष दाहालको ‘पार्टी रूपान्तरण र पुनर्निर्माणको सङ्कल्पः आजको आवश्यकता’ शीर्षकको राजनीतिक प्रतिवेदन बैठकमा प्रस्तुत गर्ने निर्णय गरेको थियो।
बैठकको प्रारम्भमा अध्यक्ष दाहालले पछिल्लो राजनीतिक परिस्थिति विवरण प्रस्तुत गर्ने छन्। प्रतिवेदन पेस भएपछि त्यसका विषयमा गहन छलफल हुनेछ। बैठक सञ्चालनको मोडालिटी तय गर्नका लागि स्थायी समिति बैठक बिहान ८ बजे बस्ने जानकारी केन्द्रीय कार्यालय सचिव डोरप्रसाद उपाध्यायले दिएका छन्।
केन्द्रीय समितिको यो बैठकमा ८१४ सदस्यको सहभागिता रहने बताइएको छ। यसमा ४०९ पूर्ण सदस्य, २०५ वैकल्पिक सदस्य, तीन आयोगका ७५ प्रतिनिधि, सात भौगोलिक र तीन गैरभौगोलिक क्षेत्रका १० प्रदेश पदाधिकारीसमेत सामेल हुनेछन्।
