काठमाडौँ – माघ १६ गते प्रदर्शनमा आउने बहुप्रतीक्षित नेपाली चलचित्र ‘एक्टर: टेक वन’को नयाँ गीत ‘के भरोसा गरम’ सार्वजनिक भएको छ। भिडियोमा सुपरस्टार प्रदीप खड्कासँग अभिनेत्री आना शर्मा र दिव्या रायमाझीको प्रेम त्रिकोणात्मक कथा प्रस्तुत गरिएको छ। चलचित्रको टिजरले प्रदिप खड्का र राजबल्लभ कोइरालाको बीचका दृश्यहरूबाट कथाको भिन्न आयामको सङ्केत गरे पनि गीतको भिडियोले प्रदीपको सम्भावित दोहोरो भूमिका रहेको शङ्का उत्पन्न गराएको छ। गीतमा दिव्यासँग बोल्न नसक्ने र आनासँग बोलेका दृश्यले यो शङ्कालाई बल दिएको छ।
गीतमा हर्कुलस बस्नेत र इन्दिरा जोशीको आवाज सुन्न सकिन्छ भने उर्मिला गुरुङको शब्द र हर्कुलसको सङ्गीतले गीतलाई सशक्त बनाएको छ। किरण थापाको कोरियोग्राफी र राजेन्द्र मोक्तानको कलर ग्रेडिङले भिडियोलाई थप जीवन्त बनाएको छ। चलचित्रको निर्देशन राजन भुसालले गरेका हुन्, र स्क्रिप्टमा आकाश बराल र राजन भुसालको सहकार्य रहेको छ। चलचित्रमा प्रदिप, आना, दिव्या, राजबल्लभ कोइराला, दिव्य देव, उषा रजक, सृजना अधिकारी र सुशील सिटौला जस्ता कलाकारहरूको प्रमुख भूमिका छ।
‘एक्टर: टेक वन’ अधृत फिल्म्स् र अ मोती फिल्मको संयुक्त प्रस्तुति हो। निर्माता थमन कुमार भण्डारी, क्रियटिभ निर्माता मोती कार्की, र सह-निर्माता अनीश भुसाल रहेको यो चलचित्रको छायांकन नरेन्द्र मैनाली र सम्पादन निमेष श्रेष्ठले गरेका छन्।
