समाचार सुन्नुहोस :
काठमाडौँ – बाजुरा जिल्लाको केन्द्रविन्दु भएर आज बिहान ५.२ रेक्टर स्केलको भूकम्प गएपछि मानवीय क्षति नभए पनि १५ घर पूर्ण रूपमा भत्किएका छन्। जिल्ला प्रशासन कार्यालय, बाजुराका अनुसार भत्किएका घरका मानिसहरूलाई सुरक्षित स्थानमा सारिएको छ।
जिल्ला प्रशासनका प्रमुख जिल्ला अधिकारी मेघनाथ पाध्याले हालसम्म १५ घर बस्न अयोग्य भइसकेको र थप विवरण संकलनको काम जारी रहेको जानकारी दिए। “भूकम्पका कारण मानिसहरूलाई कुनै क्षति पुगेको छैन। पूर्ण रूपमा भत्किएका घरका परिवारलाई अस्थायी रूपमा आफन्तको घरमा बस्न सुझाव दिएका छौं,” उनले भने।
उनका अनुसार १५० भन्दा बढी घर आंशिक रूपमा क्षतिग्रस्त भएका छन्। थप विवरण सङ्कलन गरिरहेकाले स्थितिको स्पष्ट तथ्यांक आउन समय लाग्ने बताएका छन्। प्रभावित क्षेत्रका मानिसहरूको सुरक्षाका लागि सुरक्षा निकाय परिचालन भइसकेको छ भने पीडितहरूलाई आइतबारदेखि राहत उपलब्ध गराउने योजना तयार गरिएको छ।
भूकम्पको केन्द्रविन्दु बाजुराको जगन्नाथ गाउँपालिकाको गोत्रीमा रहेको थियो। यो प्रकोपले क्षति भएको स्थानहरूमा प्रशासनले राहत तथा उद्दारका कार्यक्रम तत्काल अघि बढाउँदैछ।
