टोकियो – पछिल्लो समय जापान आउन चाहने नेपालीहरूको संख्या तीव्र गतिमा वृद्धि भइरहेको छ । चाहे विद्यार्थी भिसा होस् वा वर्किङ भिसा, जापान पुग्ने नेपालीहरूको लहर जारी छ ।
यस प्रक्रियामा एजुकेसन कन्सल्टेन्सी र मेनपावर एजेन्सीहरूले ठुलो भूमिका खेलिरहेका छन् । जापान पुग्नका लागि नेपालीहरूले न्यूनतम १३ लाख रूपैयाँ खर्च गर्नुपर्छ । जापान पुगिसकेपछि मात्र धेरैलाई थाहा हुन्छ, त्यहाँको वास्तविकता उनीहरूको कल्पनाभन्दा निकै फरक छ । सोचेजस्तो आम्दानी नहुने र परिवारको अपेक्षा पूरा गर्नुपर्ने दबाबले गर्दा धेरै नेपालीहरूले अवैध रूपमा काम गर्न बाध्य भइरहेका छन् ।
जापानको अध्यागमन कानुन कडा भएकाले विद्यार्थीहरूले तोकिएको समयभित्र मात्रै काम गर्न पाउँछन् । वर्किङ भिसामा आएका व्यक्तिहरूको समेत आम्दानी सन्तोषजनक छैन । महँगो जीवनशैली भएका शहरहरूमध्ये टोकियो अग्रस्थानमा पर्दछ । परिवारको आर्थिक भार टार्नका लागि अवैध रूपमा काम गर्ने नेपालीहरू अध्यागमन प्रहरीको निगरानीमा पर्न थालेका छन् ।
अध्यागमन नियम उल्लंघन गर्ने नेपालीहरूको निष्कासन दर बढिरहेको छ । गत सातामात्र जापानी अधिकारीहरूले ७ जना नेपालीलाई निष्कासन गरी नेपाल फिर्ता पठाएका छन् । टोकियोमा विगत २० वर्षदेखि बस्दै आएका एक नेपालीका अनुसार अहिले पनि केही नेपालीहरू अध्यागमन प्रहरीको नियन्त्रणमा छन् ।
निष्कासनमा परेकाहरूमा साबित्री खड्का तिरुवा, सुशन गिरी, गीता विक, बुद्धिकुमारी विक, उरुसल तामाङ लामा, मधुकर विष्ट र मनोहर ढुंगेल रहेका छन् । ती नेपालीहरू थाइ एयरवेयजको जहाजमार्फत काठमाडौं पठाइएको हो ।
अध्यागमन कानुन उल्लंघन गरेको आरोपमा उनीहरूलाई निष्कासन गरिएको भनिए पनि विस्तृत विवरण सार्वजनिक गरिएको छैन । जापान सपना बोकेर आएका नेपालीहरूलाई यहाँको कठोर नियम र वास्तविकताले चुनौती थपिरहेको छ ।
