टोकियो – जापानका विभिन्न ७ प्रिफेक्चरमा १ सय २५ भन्दा बढी चोरीका घटनामा संलग्न ५ जना पक्राउ परेका छन् । मियागी, यामागाता र इबाराकी प्रिफेक्चरको प्रहरीले ७ प्रिफेक्चरमा भएको व्यापक चोरीको घटनामा संलग्न ५ भियतनामी पुरुषलाई पक्राउ गरेको हो ।
ती व्यक्तिहरूले नगद र गरगहना गरेर १ करोड ३६ लाख येन चोरी गरेको आरोप छ । यो समूहले गत फेब्रुअरीदेखि जुनसम्म १ सय २५ घरमा चोरी गरेका थिए । मियागी प्रिफेक्चरल प्रहरीका अनुसार ती पाँचजना एकअर्काका परिचित हुन् । उनीहरू ग्यास बर्नरको प्रयोग गरी सिसा तताएर फुटाउने (याकिरी भनिने) विधि अपनाई खाली घरमा प्रवेश गर्ने गरेको खुलेको छ ।
प्रहरीले जानकारी दिएअनुसार, चोरी गरिएका सामानहरू उनीहरूले बेचेर दैनिक खर्च र मनोरञ्जनका लागि प्रयोग गरेका थिए ।
प्रहरीका अनुसार, सात प्रिफेक्चरमा भएको चोरीको विवरण यस प्रकार छ:-
- मियागी: ८ घटना
- यामागाता: १७ घटना
- इबाराकी: १० घटना
- तोचिगी: ३ घटना
- साइतामा: ४२ घटना
- चिबा: २८ घटना
- निगाता: १७ घटना
ती पाँचजना आरोपितलाई जुन महिनामा सेन्दाईमा रहेको एउटा खाली घरभित्र भेटिएपछि पक्राउ गरिएको थियो । प्रहरीका अनुसार समूहले झारपातले भरिएको बगैंचा भएका घर र गैराजमा गाडी नभएका घरलाई मुख्य रूपमा लक्ष्य बनाएको थियो । मियागी प्रिफेक्चरल प्रहरीले भनेअनुसार उनीहरूलाई सेन्दाई जिल्ला अदालतमा मुद्दा चलाइनेछ ।
