काठमाडौं – स्थानीय तह उपनिर्वाचनअन्तर्गत मोरङको ग्रामथान गाँउपालिकामा नेकपा माओवादीका नमोनारायण माझी निर्वाचित भएका छन् । मुख्य निर्वाचन अधिकृतको कार्यालयका अनुसार विजयी ५४ वर्षीय माझीले ६ हजार ९ सय ६९ मत पाएका छन् ।
नेपाली कांग्रेसका बलराम सरदारले ५ हजार ३ सय ३३ मत पाएका छन् । ७३ वर्षीय सरदार उनी १ हजार ६ सय ३६ मतले पराजित भएका हुन् । त्यसैगरी, नेकपा एमालेका तुलसीराम माझी ४ हजार १ सय ५९ मतसहित तेस्रो स्थानमा रहे । २०७९ को स्थानीय तह निर्वाचनमा कांग्रेसले जितेको गाउँपालिकाको नेतृत्व माओवादीले उपनिर्वाचनमार्फत खोसेको हो ।
२०७९ को स्थानीय तह निर्वाचनमा कांग्रेसले जितेको गाउँपालिकाको नेतृत्व उपनिर्वाचनमा माओवादीले खोसेको छ । २०७९ को निर्वाचनमा फराकिलो अन्तरले तेस्रो बनेको माओवादीले कांग्रेसको गढ मानिने ग्रामथानमा यस पटक कांग्रेस कार्यकर्ता नमोनारायणलाई पार्टीमा भित्र्याएर उम्मेदवार बनाएको थियो । लामो समय कांग्रेस राजनीतिमा रहेका उनी २०५४ को स्थानीय निर्वाचनमा तत्कालीन लखन्तरी गाविसको अध्यक्षमा कांग्रेसबाटै निर्वाचित भएका थिए ।
