काठमाडौं – राष्ट्रिय स्वतन्त्र पार्टी (रास्वपा) का सभापति रवि लामिछानेको जिल्ला सरकारी वकिलको कार्यालयमा जारी छ । यसअघि शुक्रबार बिहान ९ बजेदेखि दिउँसो साढे ३ बजेसम्म उनको बयान चलेको थियो । काठमाडौंको स्वर्णलक्ष्मी बहुउद्देश्यीय सहकारी ठगीको अनुसन्धानका लागि उनलाई पोखराबाट बिहीबार काठमाडौं ल्याइएको हो ।
शुक्रबारदेखिनै उनको बयान सुरु गरिएको हो । रविसँगै पक्राउ अनुमति जारी भएका छविलाल जोशीलाई बयान लिएर प्रहरीले पोखरा फिर्ता पठाइसकेको छ । प्रहरीले पहिले स्वर्णलक्ष्मी सहकारीमा छापा मारेर केही कागजातहरू बरामद गरेको थियो । जसमा गाडी किन्न भनेर रवि लामिछाने र जीवी राईले दुई पटक गरेर ४६/४६ लाख रुपैयाँ लिएको भेटिएको थियो ।
प्रहरी अधिकृतहरूले यो बीचमा ऋण तिर्न भन्दै लामिछानेले काटेका चेकहरू समेत बरामद गरेको छ । लामिछाने र उनकी पत्नीको खातामा भएको कम्तीमा ५० करोड रुपैयाँ बराबरको कारोबारबारे पनि जाँच गरिरहेको छ । लामिछाने कात्तिक २ गते पक्राउ परेका थिए । सहकारी ठगी, सङ्गठित अपराध र सम्पत्ति शुद्धीकरण मुद्दाको कसुरमा अनुसन्धानका लागि कास्की प्रहरीको हिरासतमा रहेका उनलाई बिहीबार साँझ काठमाडौँ ल्याइएको थियो ।
पोखराको सूर्यदर्शन सहकारी ठगी प्रकरणमा कात्तिक २ देखि उनी कास्की जिल्ला प्रहरीको हिरासतमा छन् । शुक्रबार लामिछानेको बयान जारी रहँदा उनकी पत्नी निकिता पनि सरकारी वकिलको कार्यालयमा उपस्थित भएकी थिइन् ।
