काठमाडौं – काठमाडौंमा बसको ढोकाबाट खसेर दुई यात्रुको मृत्यु भएको छ । शनिबार काठमाडौंको तारकेश्वर नगरपालिका-८ शेषमतिस्थित शान्तिटोल गेट नजिकै बा ४ ख ७१११ नम्बरको बसको ढोकाबाट खसेर दुई जनाको मृत्यु भएको हो ।
जिल्ला प्रहरी परिसर काठमाडौंका प्रवक्ता एसपी नवराज अधिकारीका अनुसार उक्त काभ्रेस्थलीबाट रत्नपार्क रूट चल्ने उक्त बसबाट खसेर मृत्यु हुनेमा नुवाकोटको ककनी गाउँपालिका-५ घर भएका अन्दाजी ४०-४५ वर्षका सञ्चबहादुर लामा र तादी गाउँपालिका-१ घर भई हाल लामबगर बस्ने ५८ वर्षीया सुन्तली ओझा छिन् ।
बसको ढोकाबाट खसेर गम्भीर घाइते भएका उनीहरूलाई उपचारका लागि त्रिवि शिक्षण अस्पताल लगिएकोमा बिहान ८ः४५ बजे चिकित्सकले मृत घोषणा गरेको एसपी अधिकारीले जानकारी दिए । बसका सहचालक गोर्खा घर भएका अन्दाजी १७ वर्षीय निसान बिष्ट घाइते भएका छन् । उनको ट्रमा सेन्टरमा उपचार भइरहेको छ ।
दुर्घटनापछि बस चालक फरार थिए । त्यसपछि त्यहाँका स्थानीयहरू जम्मा भएर बस तोडफोड गरेका थिए । स्थिति असामान्य बनेपछि बाक्लो संख्यामा सुरक्षाकर्मी परिचालन गरिएको थियो ।
