टोकियोमा नेपाल फेस्टिभल औपचारिक रूपमा सुरु

• नेपाल र नेपाली पहिचानलाई जापानमा उजागर गर्ने महत्त्वपूर्ण अवसर

टोकियो – जापानको राजधानी टोकियोमा ‘१४औँ नेपाल फेस्टिभल-२०२४’ शनिबार औपचारिक रूपमा सुरु भएको छ । नेपाल र नेपाली पहिचानलाई जापानमा उजागर गर्ने महोत्सवका रूपमा विगत डेढ दशकदेखि हुँदै आएको नेपाल फेस्टिभल औपचारिक रूपमा सुरु भएको हो ।

दुई दिनसम्म सञ्चालन हुने फेस्टिभल गैरआवासीय नेपाली संघ (एनआरएनए) जापान, नेपाल आदिवासी जनजाति महासंघ जापान र नेपाली राजदूतावासको संयुक्त प्रयासमा आयोजना गरिएको छ । भव्य कार्यक्रमकाबीच भएको उद्घाटन समारोहअघि नेपालका विविध जातजातिको परम्परागत झाँकी प्रदर्शन गरिएको थियो ।विशेष गरी नेपालको कला र संस्कृतिलाई जापानमा प्रवर्द्धन गरी जापानमा जन्मिएर जापानमा नै बसोबास गर्दै आएका नेपालीहरूलाई नेपाली संस्कृतिको बारेमा जानकारी दिनुका साथै जापानी नागरिकलाई नेपाली संस्कृतिका बारेमा जानकारी गराइ नेपालको पर्यटन प्रवर्द्धनमा सहयोग पुर्‍याउने उद्देश्यका साथ फेस्टिभल आयोजना गरिएको बताइएको छ ।फेस्टिभलमा नेपाली परिकार, हस्तकलाका सामानहरू, र पर्यटनसम्बन्धी जानकारीमूलक स्टलहरूको पनि प्रदर्शन गरिंदैछ । नेपाल फेस्टिभलले दुई देशबीचको सांस्कृतिक सम्बन्धलाई थप बलियो बनाउँदै नेपाली समुदायको एकता र पहिचानलाई उजागर गर्न सघाउ पुर्‍याउने विश्वास लिइएको छ ।