समाचार सुन्नुहोस :
काठमाडौँ – गृहमन्त्री रमेश लेखकले चाडपर्वका लागि कृतिम अभाव, कालाबजारी, मूल्यवृद्धि, र गुणस्तरहीन वस्तुको बिक्री–वितरण नियन्त्रण गर्न निर्देशन दिएका छन्। चाडपर्वलक्षित सहज आपूर्ति व्यवस्थापन र प्रभावकारी बजार अनुगमनसम्बन्धी विषयमा सरोकारवालासँगको छलफलमा उनले यस्तो बताएका हुन् । उनले चाडपर्वमा दैनिक उपभोग्य सामग्रीको सहज आपूर्ति सुनिश्चित गर्नुपर्ने र कृतिम अभाव कुनै हालतमा सह्य नहुने बताएका छन्।
मूल्यवृद्धि र गुणस्तरहीन वस्तुहरूको बिक्री कडाइका साथ नियन्त्रण गर्न पनि उनले आग्रह गरे। लेखकले एकीकृत रूपमा काम गर्नुपर्ने र चाडपर्वपछि परिणामको मूल्यांकन गर्न अर्को बैठक बस्ने बताए। गृहसचिव एकनारायण अर्यालले बजार अनुगमनमा तीव्रता दिनुपर्नेमा जोड दिए। बाणिज्य विभागले अनुगमनलाई प्रभावकारी बनाउन जिल्ला अधिकारीहरूसँग समन्वय गर्ने जानकारी गराएको छ।
