समाचार सुन्नुहोस :
काठमाडौँ – आइसीसी टीट्वान्टी पुरुष विश्वकप क्रिकेट प्रतियोगिता आइतवार बिहान ६ बजेदेखि प्रारम्भ भएको छ । आगामी असार १५ गतेसम्म सञ्चालन हुने यो प्रतियोगितामा विश्वका २० देशले भाग लिएका छन् । यो विश्वकपको पहिलो दिन अर्थात आज दुई खेल खेलिँदैछ । आजको पहिलो खेल नेपाली समय अनुसार अहिले बिहान ६ बजेदेखि प्रारम्भ हुँदैछ । पहिलो खेलको औपचारिक थालनीअघि अहिले डालासमा उद्घाटन समारोह आयोजना गरिएको छ । पहिलो खेलमा अहिले आयोजक अमेरिका र क्यानडाबीच खेल हुँदैछ । डालासस्थित ग्राण्ड प्रेरी स्टेडियममा उद्घाटन खेल खेलिँदैछ ।
आजै हुने दोस्रो खेलमा वेस्ट इण्डिज र पपूवा न्यूगिनी भिड्दै छन् । गुयनास्थित प्रोभिडेन्स स्टेडियममा हुने यो खेल नेपाली समय अनुसार आइतवार राति ८ः१५ बजेदेखि प्रारम्भ हुनेछ । यो विश्वकपमा आयोजक अमेरिका र वेस्ट इण्डिजसहित, भारत, अस्ट्रेलिया, पाकिस्तान, बंगलादेश, नेपाल, श्रीलंका, अफगानिस्तान, न्यूजील्याण्ड, दक्षिण अफ्रिका, इङल्याण्ड, आयरल्याण्ड, नेदरल्याण्डस, नामिबिया, पीएनजी, क्यानडा, स्कटल्याण्ड, ओमान र युगाण्डा सहभागी हुँदैछन् ।
२० टिमलाई हरेकमा ५ देशलाई राखेर ४ समुहमा विभाजन गरिएको छ । समुह चरणको खेलपछि हरेक टिमका शिर्ष २ देश सुपर ८ मा पुग्ने छन् । समुह ए मा अमेरिका, क्यानडा, भारत, पाकिस्तान र आयरल्याण्ड रहेका छन् । त्यस्तै समुह बी मा अस्ट्रेलिया, इङल्याण्ड, नामिबिया, ओमान र स्कटल्याण्ड रहेका छन् । त्यसैगरी समुह सी मा वेस्ट इण्डिज, अफगानिस्तान, न्यूजील्याण्ड, पिएनजी र युगाण्डा रहेका छन् भने समुह डी मा नेपाल, बंगलादेश, नेदरल्याण्डस, दक्षिण अफ्रिका र श्री लंका रहेका छन् ।
