काठमाडौं – कांग्रेस सभापति शेरबहादुर देउवाले स्वस्थ आलोचनाले काम गर्न उत्साह बढाउने बताएका छन् । नेपाल प्रेस युनियनको ३२औँ स्थापना दिवसको अवसरमा शनिबार काठमाडौंमा आयोजित एक कार्यक्रममा बोल्दै सभापति देउवाले उचित आलोचनाले काम गर्न झन् उत्साह बढाउने बताएका हुन् ।
पार्टीमा केही समस्या भए करेक्सन गर्न आफू तयार रहेको उनले बताए । तर, आलोचना भने स्वस्थ हुनुपर्ने उनको भनाइ छ । ‘कांग्रेसले आलोचनाबाट डराउनुपर्ने कुरा छैन । डराउँदैन पनि,’ सभापति देउवाले भने, ‘कतिपय उचित आलोचनाहरू हुन्छन् । त्यसले काम गर्न अझ उत्साह हुन्छ । केही समस्या भए करेक्सन हुन्छ । आलोचनाले समस्या समाधान गर्न सहज हुन्छ । तर, स्वस्थ आलोचना गर्नुस् ।’
प्रजातन्त्रको सुदृढीकरणको काममा एकजुट भएर लाग्नुपर्ने आवश्यकता रहेको उनले बताए । प्रजातन्त्रको खिलापमा एकथरी लागिपरेको उल्लेख गर्दै उनले त्यसको सुदृढीकरणमा सबै राजनीतिक दलहरू लाग्नुपर्ने बेला आएको बताए । ‘अहिले देशमा बडा चुनौती छ । लामो लडाइँपछि आएको प्रजातन्त्र हो । यसको खिलापमा एकथरी लागेका छन्,’ उनले भने, ‘हामी सबैले एकजुट भएर प्रजातन्त्रको सुदृढीकरण गर्ने काममा लाग्नुपर्छ । प्रजातन्त्रको विकल्प प्रजातन्त्र नै हो । अरू कुनै हुन सक्दैन ।’
यसअघि भने सभापति देउवाले पार्टीभित्रैबाट असहयोग भएको भन्दै असन्तुष्टि जनाउँदै आएका थिए । पार्टीमा एकलौटी गरिरहेको र आलोचना सुन्नै नचाहेको आरोप लागिरहेका बेला अब उनी लचिलो हुने संकेत देखिएको हो ।
