समाचार सुन्नुहोस् :
काठमाडौं – राष्ट्रिय प्रजातन्त्र पार्टीका सांसद ज्ञानेन्द्र शाहीले संसद सत्ता र कुर्सीको लागि मात्र प्रयोग भएको आरोप लगाएका छन् । मंगलबार प्रतिनिधि सभाको बैठकमा सांसद शाहीले बहुदलीय व्यवस्था पुर्नस्थापना भएको ३४ वर्ष वित्दा पनि नेपालीको भविष्य बनाउन संसदले केहि नगरेको आरोप लगाए ।
सांसद शाहीले भने– ‘यो देशमा बहुदलीय व्यवस्था भएको ३४ वर्ष भयो, तर कस्सम खाएर भन्छु यो देश विकास हुनुको साटो विनाश हुँदै गइरहेको छ । ३४ वर्षको इतिहासमा देश बनाउने थलो नेपाल र नेपालीको भविष्य उज्ज्वल बनाउने कोही हो भने त्यो संसद हो । तर विडम्बनाकासाथ भन्नुपर्छ ३४ वर्षको इतिहासमा विकासको लागि भन्दा पनि सत्ता र कुर्सीको लागि यो सदन प्रयोग भयो । आज संसद र मूलुक धरासयी भयो ।’
सांसद शाहीले प्रत्येक महिनाको आफ्नो तलबबाट तीन हजार रुपैयाँ खेलाडीलाई खर्च गर्ने घोषणा पनि गरे । प्रदेशलाई खारेज गरी १६५ सांसदहरुबाट १०५ जनालाई प्रत्यक्ष सांसद बनाउन पनि उनले आग्रह गरे ।
