काठमाडौँ – भदौ १०मा प्रदर्शन हुने चलचित्र ‘राधा’ले तीज गीत सार्वजनिक गरेको छ । सोमबार सार्वजनिक गीतमा सृष्टि श्रेष्ठ र प्रियंका कार्कीले नृत्य गरेका छन् ।परम्परागत तीज गीतभन्दा भिन्न गीत कालीप्रसाद बास्कोटाले तयार गरेका हुन् । गीतमा सज्जा चौलागाइँ र स्वस्तिका ढकालले स्वर दिएका छन् । गीत रचना गरेकी हुन् सिर्जना खत्रीले ।
तीजको छेको पारेर रिलिज हुन लागेको फिल्ममा तीज गीत राख्नुको आसय हो, दर्शक बोलाउने । गीतले यो काम गर्न सक्छ कि सक्दैन भविष्यले बताउला तर गीतको अडियो र भिडियो प्रभावशाली देखिएको छ । सुवर्ण थापा निर्देशित फिल्मको गीतलाई कविराज गहतराजले कोरियोग्राफी गरेका हुन् ।
यो गीतलाई प्रियंका कार्कीको फिल्ममा कमब्याक भनी चर्चा गरिएको छ । विवाह गरेर एक सन्तानकी आमा बनेकी प्रियंकाका बीचमा केही फिल्म र म्युजिक भिडियो रिलिज भए पनि ती विवाअघि नै गरेका काम थिए । छोरी हुर्काएर उनले खेलेको यो पहिलो गीत हो । गीतमा प्रियंका कार्की लयमा देखिएकी छिन् । कतिपय ठाउँमा सृष्टि श्रेष्ठलाई प्रियंका भेट्याउन गाह्रो परेको स्पष्ट देखिन्छ ।
यो फिल्मलाई सौगात मल्ल, देवकी बिष्ट र विक्रमदास जोशी मिलेर निर्माण गरेकी हुन् । फिल्मले श्रीमान्को पर्खाइमा रहेकी एक महिलाको कथा पेश गर्छ । फिल्ममा सौगात मल्ल, सृष्टि श्रेष्ठ, खगेन्द्र लामिछाने, मेनुका प्रधान, लोकेन्द्र लेखक आदिको अभिनय रहेको छ । निश्चल बस्नेत, दिव्य देव,दयाहाङ फिल्ममा अतिथि भूमिकामा देखिनेछन् ।
