काठमाडौं – अभिनेत्री केकी अधिकारीले निर्वाचनको समयमा देश बाहिर हुनु र आफ्नो बहुमूल्य भोटको प्रयोग गर्न नपाउने अवस्था बनेको भन्दै खिन्नता व्यक्त गरेकी छन् । हाल अमेरिकामा रहेकी अधिकारीले सामाजिक सञ्जालमार्फत मताधिकारीको प्रयोग गर्न पाउनु ठूलो कुरा भएको बताएकी हुन् ।
‘निर्वाचनको समयमा देश बाहिर हुनु र आफ्नो बहुमूल्य भोटको प्रयोग गर्न नपाउनुले पनि चित्त दुख्ने रहेछ’, अधिकारीले भनेकी छन्, ‘काम विशेषले बाहिर भएको कारणले मैले यस पटक मेरो मताधिकारको प्रयोग गर्न पाइनँ । तपाईंहरुले चाहिँ आफ्नो एक भोटको मूल्य पक्कै बुझ्नु भएकै छ ।’
उनले निर्वाचनमा सहभागी भइ आफ्नो मताधिकारको प्रयोग गर्न अनुरोध गरेकी छन् । उनले शान्त, सुरक्षित अनि सुव्यवस्थित वातावरणमा निर्वाचन सम्पन्न हुन सकोस् भन्ने कामना समेत गरेकी छन् । अधिकारी केही साताअघि कार्यक्रमको शिलशिलामा अमेरिका पुगेकी हुन् । स्थानीय तहको निर्वाचन शुक्रबार हुँदैछ ।
