काठमाडौं । कोरोनाको नयाँ भेरियन्ट ओमिक्रोनका कारण क्रिसमसको बेला विश्वभर लाखौँ मानिसहरूले यात्रा अवरोधको सामना गर्नु परेको छ । कोभिड प्रतिबन्धहरू, बढ्दो ओमिक्रोन संस्करणले सुरक्षा व्यवस्था कडा बनाउँदा थुप्रै अन्तर्राष्ट्रिय उडानहरू रद्द भएका छन् ।
फ्लाइटअवेयर वेबसाइटका अनुसार विश्वभरि हजारौँ उडानहरू रद्द गरिएका छन् । इटाली, स्पेन र ग्रीसले फेरि घर बाहिर निस्कँदा मास्क अनिवार्य बनाएका छन् । उत्तरी स्पेनको क्याटालोनियाले रातभरको कर्फ्यू लगाएको छ । नेदरल्यान्ड्समा कडा प्रतिबन्धात्मक व्यवस्था जारी गरिएको छ ।
ओमिक्रोन अन्य भेरियन्टहरू भन्दा हल्का छ भन्ने प्रारम्भिक निष्कर्षहरूको बाबजुद, वैज्ञानिकहरू सङ्क्रमितहरूको बढ्दो सङ्ख्याबाट चिन्तित छन् । बिहीबार बेलायत, फ्रान्स र इटालीमा सङ्क्रमणको नयाँ रेकर्ड बनेका छन् । अमेरिकामा, दैनिक ओमिक्रोनका केसहरू पछिल्लो डेल्टा लहरको चरम सीमाभन्दा पनि बढेको छ । देशभरका अस्पतालहरू बिरामीले भरिन थालेका छन् ।
अमेरिकाका शीर्ष सङ्क्रामक रोग विशेषज्ञ, डा एन्थोनी फाउचीले क्रिसमस यात्राले पूर्ण खोप लगाइए पनि कोरोनाको सङ्क्रमण फैलावटलाई रोक्न नसक्ने चेतावनी दिएका थिए । क्रिसमसको पूर्व सन्ध्यामा अमेरिकन एयरलाइन्सले चालक दलका सदस्यहरूमा गर्नु पर्ने कोरोना परीक्षणबाट कर्मचारी अभावको स्थितिसँग पीडित हुनु परेको बताएका थिए । अस्ट्रेलियामा पनि शुक्रबार चाडपर्वको यात्रामा हजारौँको सङ्ख्यामा असर परेको छ भने सिड्नी र मेलबर्नबाट अन्य सहरका १०० भन्दा बढी आन्तरिक उडानहरू रद्द भएका छन् ।
