काठमाडौं – लियोनल मेसीले फ्रेन्स लिग वानमा पहिलो गोल गर्नुका साथै काइलियन एमबाम्पेले करिअरकै सबभन्दा छिटो गोल गरेको दिन पेरिस सेन्ट जर्मेन (पीएसजी)ले शनिबार राति नान्ट्सलाई ३–० ले हराएको छ । मेसीले खेल सकिन तीन मिनेट बाँकी हुँदा गोल गर्दै पीएसजीको जित पक्का गरेका थिए । एमबाप्पेको दिएको पास नियन्त्रणमा लिएर मेसीले विपक्षी रक्षकलाई कटाएर हानेको ‘सिंग्नेचर सट’लाई नान्ट्सका गोलकिपर अल्बान लफोन्टले रोक्न सकेनन् ।
त्यसअघि पीएसजीले दोस्रो मिनेट वित्न नपाउँदै एमबाप्पेको गोलबाट अग्रता लिएको थियो । जुन २०१७ पछि पीएसजीले सबभन्दा चाडो गरेको गोल हो । एमबाप्पेको भने करिअरकै सबभन्दा चाडो गरेको गोल हो । जारी सिजन एमबाप्पेको यो सातौं गोल हो । ६५औं मिनेटमा पीएसजीका गोलकिपर केलर नाभासले रातो कार्डको सामना गरेपछि घरेलु टोली दश खेलाडीमा सीमित भएको थियो । त्यसको १० मिनेटपछि भ्रमणकारी नान्ट्सका रन्डल कोलो मुएनीले बराबरी गोल फर्काएका थिए ।
८२ मिनेटमा डेनिस एप्पीले गरेको आत्मघाती गोलबाट पीएसजीले पुनः अग्रता लियो । मेसीले हानेको बल क्लियर गर्न खोज्दा एप्पीले आफ्नै पोष्टमा गोल गरेका थिए । जारी सिजन घरेलु मैदानमा अपराजित नतिजालाई कायम राखेको पीएसजीले जितसँगै १४ खेलबाट ३७ अंक जोडेको छ । जुन दोस्रो स्थानको रेनेसभन्दा १२ अंकले अगाडि हो । पराजित नान्ट्स १८ अंकका साथ ११औं स्थानमा छ । पीएसजीले अब च्याम्पियन्स लिगका लागि म्यानचेस्टर सिटीको भ्रमण गर्नेछ । पीएसजीले पहिलो लेगमा सिटीलाई २–० ले हराएको थियो ।
