आयोजक जापानलाई हराउँदै मेक्सिको तेस्रो स्थानमा

काठमाडौं — मेक्सिकोले टोकियो ओलम्पिकको पुरुष फुटबलमा काँस्य पदक जितेको छ । शुक्रबार तेस्रो स्थानका लागि भएको खेलमा आयोजक राष्ट्र जापानलाई ३–१ गोलले हराउँदै मेक्सिकोले काँस्य पदक जितेको हो ।

साइतामा स्टेडियममा मेक्सिकोलाई जिताउन भेजा, भास्क्वेज र कोर्डोभाले एक–एक गोल गरे । जापानका मितोमाले एक गोल गरे । मेक्सिकोले पहिलो हाफमा दुई गोल गरेको थियो भने दोस्रो हाफमा एक गोल थप्यो ।

पुरुष फुटबलमा गोल्ड मेडलका लागि ब्राजिल र स्पेनले खेल्दै छन् । यो खेल शनिबार हुनेछ ।