टोकियो ओलम्पिक : पुरुष फुटबलमा मेक्सिकोलाई कास्य

काठमाडाैं – टोकियो ओलम्पिकअन्तर्गत पुरुष फुटबलको कास्य पदक मेक्सिकोले हात पारेको छ । उसले शुक्रबार भएको खेलमा आयोजक जापानमाथि ३-१ गोल अन्तरको जित हात परेको हो ।

सैतामा रंगशालमा मेक्सिकोलाई जित दिलाउन सबेस्टियन कोर्डोभा, एलेक्सिस भेगा र जोहन भास्केजले समान १-१ गोल गर्दा जापानका काउरु मिटोमाले १ गोल फर्काए । खेलको १३ औँ मिनेटमा कोर्डोभाले पेनाल्टीमार्फत गोल गर्दै मेक्सिकोलाई अग्रता दिलाए । २२ औँ मिनेटमा भास्केजले टोलीको अग्रता दोब्बर बनाए ।

५८ औँ मिनेटमा भेगाले मेक्सिकोका लागि तेस्रो गोल गरे । ७८ औँ मिनेटमा मिटोमाले जापानका लागि १ गोल फर्काए । यो स्पर्धाको स्वर्णका लागि शनिबार ब्राजिल र स्पेन प्रतिस्पर्धा गर्दैछन् । ओलम्पिक पुरुष फुटबलमा यु-२३ टोलीको सहभागिता रहने गरेको छ ।