काठमाडौं – विश्व चर्चित पेयपदार्थ कोकाकोलाले स्टार फुटबलर क्रिस्टियानो रोनाल्डोका कारण एकै दिन ४ बिलियन अमेरिकी डलरको सेयर मूल्य गुमाएको छ ।
पोर्चुगलका कप्तान रोनाल्डोले सोमबार युरो कप अन्तर्गत हंगेरी विरुद्धको खेल अघि भएको पत्रकार सम्मेलनका क्रममा कोकाकोलाको बोतल हटाएर एक्वा भन्दै पानीको बोतल देखाएका थिए । रोनाल्डोको यो भिडियो समाजिक सञ्जालमा भाइरल बनेपछि कोका कोलाको सेयर मूल्यमा गिरावट आएको छ ।
रोनाल्डोले आफ्नो फिटनेसका लागि कोकको सट्टा पानी खान सल्लाह दिएकाले सेयर मूल्यमा गिरावट आएको बताइएको छ । यसअघि कोकाकोलाको एक सेयर ५६.१० डलरमा किनबेच हुने गरेकोमा उक्त घटनापछि १.६ अंकमा गिरावट आउँदै ५५.२२ मा कारोबार भएको थियो ।
कोकाकोलाको नेट वर्थ २४२ बिलियन डलरबाट झरेर २३८ बिलियन डलरमा पुगेको छ । युरो कपको मुख्य प्रायोजक समेत रहेको कोकाकोलाले रोनाल्डोको यो घटनापछि विज्ञप्ति नै जारी गर्दै हरेक मान्छेले आफ्नो स्वाद र आवश्यकता अनुसार पेय पदार्थ रोज्ने बताएको थियो ।
रोनाल्डोको उत्कृष्ट प्रदर्शनमा मंलबार राति भएको खेलमा हंगेरीमाथि ३-० को सहज जित निकाल्दै पोर्चुगलले युरो कपमा सानदार सुरुवात गरेको छ । पोर्चुगलको जितमा रोनाल्डोले २ र राफेल गुरेरो १ गोल गरेका थिए ।
