काठमाडौं – घरेलु मेदानमा आजबाट त्रिकोणात्मक टी–ट्वान्टी सिरिज हुँदै छ । सिरिज अन्तर्गत आज (शनिबार) नेपालले नेदरल्यान्ड्ससँग खेल्दैछ ।
त्रिवि क्रिकेट मैदानमा हुने खेल दिउँसो १ः१५ बाट सुरु हुनेछ । आजको खेलमा दुबै टोली जित निकाल्दै प्रतियोगितामा सुखद सुरुवात गर्ने योजनमामा हुनेछन् ।
घरेलु मैदानमा १४ महिनापछि अन्तर्राष्ट्रिय प्रतियोगिता खेल्न लागेको नेपाल आजको खेलमा जित निकाल्दै प्रतियोगितामा आफूलाई बलियो बनाउने योजनामा छ ।
नेपाली टोलीका कप्तान ज्ञानेन्द्र मल्लले प्रतियोगितामा उत्कृष्ट प्रदर्शन गर्दै उपाधि जित्ने बताएका छन् । लामो समयपछि हुन लागेको खेलका लागि सबै खेलाडी उत्साहित भएको उनले बताए ।
“प्रतियोगिताका लागि सबै खेलाडी उत्साहित छन् । हामीले उत्कृष्ट प्रदर्शन गर्दै उपाधि जित्ने योजना बनाएका छौं । त्यसै अनुसारको तयारी पनि छ,” कप्तान मल्ले भने ।
नेपालले नेदरल्यान्ड्ससँग हालसम्म सर्वाधिक टी–ट्वान्टी आई प्रतियोगिता खेलेको छ । बलियो नेदरल्यान्ड्सलाई हराउन नेपाललाई चुनैती भने धेरै छ ।
हालसम्म नेपालले नेदरल्यान्ड्ससँग ८ टी–ट्वान्टी खेल खेलेको छ । जसमा ६ टी–ट्वान्टी अन्तर्राष्ट्रिय रहेको छ भने २ टी–ट्वान्टी खेल रहेको छ ।
नेपालले र नेदरल्यान्ड्सको अन्तिम भेट ओमानमा भएको पाँच राष्ट्र सम्मिलित टी–ट्वान्टी सिरिजमा भएको थियो । जुन खेलमा नेपालले नेदरल्यान्ड्सलाई ४ विकेटले पराजित गरेको थियो ।
नेपालले सिरिजको दोस्रो खेलमा मलेसियासँग वैशाख ६ मा खेल्नेछ । यस्तै, तेस्रो खेलमा नेपालले नेदरल्यान्ड्ससँग वैशाख ७ मा खेल्नेछ ।
नेपालले अन्तिम लिग खेलमा वैशाख ९ गते मलेसियासँग खेल्नेछ । डबल राउण्ड रोबिनको आधारमा हुने सिरिजको शीर्ष दुई टिमले उपाधिका लागि खेल्नेछन् ।
