काठमाडौं – स्वास्थ्य तथा जनसंख्या मन्त्रालयले संक्रमण दर बढ्दै गए पुन: लकडाउनको स्थिति आउन सक्ने चेतावनी दिएको छ ।
नियमित पत्रकार सम्मेलनमा सहप्रवक्ता डा.समीरकुमार अधिकारीले मानिसहरुले अनावश्यक भिडभाड, मास्क नलगाउनु, सामाजिक दुरी कायम नगर्नु, भेटघाट तथा गोष्ठी बढ्नुले संक्रमितको संख्या बढ्दै गएको भन्दै पुन लकडाउनको परिस्थित आउन सक्नेतर्फ सचेत गराउनु भएको हो ।
उहाँले आउँदै गरेको होली घरमै बसेर मनाउन र अनावश्यक भिडभाड नगर्न पनि आग्रह गर्नुभएको छ ।
मन्त्रालयले भारतमा बढेको संक्रमणको प्रभाव नेपालमा पनि पर्ने र आगामी दिनमा नेपालमा पनि संक्रमण दर बढ्न सक्ने भएकाले स्वास्थ्य सावधानी अपनाउन आग्रह गरेको छ ।
यसैबीच नेपालमा कोरोना भाइरसका १ सय ४५ जना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा तीन हजार ९ सय ६३ जनाको परीक्षण भएकोमा १ सय ४५ जनामा संक्रमण पुष्टि भएको जनाएको छ ।
सोही अवधिमा ९० जना संक्रमणमुक्त भएका छन् ।
योसँगै नेपालमा कोरोनाका कुल संक्रमितको संख्या दुई लाख ७६ हजार ३ सय ८९ पुगेको छ ।
हालसम्म दुई लाख ७२ हजार १ सय ८७ जना संक्रमणमुक्त भएका छन् ।
मन्त्रालयका अनुसार हाल एक हजार १ सय ८२ जना सक्रिय संक्रमित छन् ।
पछिल्लो चौबीस घण्टामा थप एक जनाको मृत्यु भएको छ ।
हालसम्म तीन हजार २० जनाको संक्रमणका कारण मृत्यु भइसकेको छ ।
