काठमाडौं – सरकारले अर्थतन्त्रलाई चलायमान राख्न पर्यटक भित्र्याउने रणनीति लिएको छ । तर विमानस्थलमै दिइने प्रवेश अनुमति अर्थात् अन अराइभल भिसा अझै खुला गरिएको छैन । यतिखेर नेपाल आउन चाहने पर्यटकहरूले विदेशस्थित नेपाली नियोगबाटै भिसा लिएर आउनुपर्छ ।
विश्वका साढे दुई दर्जन देशमा मात्र नेपाली नियोग छन् । जसले गर्दा पर्यटन व्यवसाय र उड्डयनजस्ता क्षेत्रमा लामो समयसम्म असर पर्ने देखिएको छ । सरकारले पछिल्लो समय नेपालमा मूल भएका वा गैरआवासीय नेपाली एवम् कूटनीतिक र अन्तर्राष्ट्रिय संस्थाहरूमा काम गर्ने व्यक्तिहरूलाई अनअराइभल भिसा खुला गरेको छ । त्यसअघि सन् २०२० मा लगातार ९ महिना नेपालमा विदेशीलाई आगमनमा कडिकडाउ गरिएको थियो ।
त्यसबीचको ६ महिनामा नेपाल प्रवेश गर्ने विदेशीहरू १ हजार भन्दा कमको संख्यामा रहेको विवरण नेपाल पर्यटन बोर्डको छ । नेपालमा धेरै पर्यटक आउने पश्चिमा देशहरूमा अझै लकडाउनकाबीच खोप कार्यक्रमहरू सञ्चालन भइरहेको छ । र स्वास्थ्य मन्त्रालयलेसमेत अझै खुलाउन नसुझाइसकेकाले अनअराइभल भिसा सुरु नगरेको संस्कृति, पर्यटन तथा नागरिक उड्डयन मन्त्रालयका प्रवक्ता तारानाथ अधिकारीले बताए ।
अझै फाटफुट मात्रामा नयाँ प्रकार देखिँदा आफूहरूमा अनअराइभल खुला गर्ने आत्मविश्वास आइनसकेको उनी बताउँछन् । कोभिड-१९ संकट व्यवस्थापन केन्द्र (सीसीएमसी) र स्वास्थ्य मन्त्रालय अझै भिसा खुला गर्नेबारे अझै अन्योलमा देखिन्छ ।
नेपालमा एकजना विदेशी पर्यटकले औसत एक साताभन्दा कम समय बिताउने र औसत दैनिक ५० डलरभन्दा केही बढी खर्च गर्ने गरेको पाइन्छ । जसले गर्दा भिसा लिने कठिनाइदेखि नेपालमा क्वारन्टीन बस्नेजस्ता थप बोझ लिएर पर्यटकहरू नआउने व्यवसायीहरूको भनाई छ । अहिलेको स्वास्थ्य मापदण्ड पालना गर्नेगरी क्वारन्टीन बस्नका लागि कोही पनि विदेशी पर्यटक नेपाल घुम्न आउन सक्ने अवस्था नभएको होटल एसोसिएसन अफ नेपाल (हान)का महासचिव साजन शाक्यले बताए ।
होटल व्यावसायीको दुखेसो
पर्यटक भए अर्थतन्त्र चल्छ, होटल, रेस्टुराँ र पर्यटकीय गन्तव्य खुल्छन् । हेर्ने मान्छे नभए देखाउन बनाइएका संरचना, करोडौँ रुपैयाँ खर्चिएर खोलिएका होटल, पर्यटक नै नआए फिरन्तेका लागि बनाइएका पदमार्ग र गन्तव्य खोलेर के फाइदा ! पर्यटन व्यवसायीको सामूहिक गुनासो छ ।
पर्यटन व्यवसायी सरकारसँग गुहार मागिरहेका छन्, ‘पर्यटन उठ्नै सकेन । सहयोग चाहियो ।’ ट्रेकिङ एजेन्सिज एसोसिएसन अफ नेपाल (टान) गण्डकीका अध्यक्ष सुशीलराज पौडेल थलिएको पदयात्रा पर्यटन उकासिदिन सरकारसँग आग्रह गर्छन् ।
अनलाइन र अन अराइभल प्रवेषाज्ञा तथा विदेशस्थित नेपाली दूतावास वा नियोगबाट प्रवेषाज्ञाको सहजीकरण पहिलेजस्तै गरिदिन, त्रिभुवन अन्तर्राष्ट्रिय विमानस्थलमा तत्काल रिपोर्ट दिन सकिने कोभिड-१९ जाँच मेसिन राख्न र तोकिएको स्वास्थ्य निकायबाट नमुना संकलन गर्न पनि पर्यटन व्यवसायीको सरकारसँग माग छ ।
यसो भन्छन् पर्यटनमन्त्री
संस्कृति, पर्यटन तथा नागरिक उड्डयनमन्त्री भानुभक्त ढकालले पिसिआर रिपोर्ट नेगेटिभ भएका विदेशी पर्यटकलाई निर्वाधरुपमा नेपाल भ्रमण गर्न दिने तथा अनअराइभल भिसाको व्यवस्था गर्न मन्त्रालयले कोभिड-१९ सङ्कट व्यवस्थापन केन्द्र (सिसिएमसी)लाई लिखितरुपमै पठाएको र छिट्टै मन्त्रिपरिषदबाट पारित हुने विश्वास दिलाए ।
उनले विदेशी पर्यटक आवागमनलाई सहज तुल्याउन व्यवसायीको आग्रहबमोजिम पर्यटन क्षेत्रको समस्या सम्बोधनका लागि अन्तरमन्त्रालय छलफल गरेर पहलकदमी लिएको र यसले छिट्टै परिणाम हासिल गर्ने बताए । पर्यटन मन्त्रालयका सचिव यादवप्रसाद कोइरालाले विदेशीको पर्यटक आवमनलाई सहज तुल्याउन मन्त्रालयले पहल गरिरहेको र छिट्टै यसले निकास पाउने उनको भनाई छ ।
