७ महिनामा ७ खर्ब ३३ अर्ब नाघ्यो व्यापार घाटा

काठमाडौं – चालु आर्थिक वर्ष २०७७/७८ को ७ महिना अवधिमा मुलुकले ७ खर्ब ३३ अर्ब ७२ करोड रुपैयाँ बराबरको व्यापार घाटा व्यहोरेको छ। भन्सार विभागको तथ्यांकअनुसार माघ मसान्तसम्ममा नेपालले ८ खर्ब ७३ अर्ब ५६ करोड रुपैयाँ बराबरको वैदेशिक व्यापार गर्दा सवा ७ खर्बभन्दा बढी घाटा व्यहोरेको देखिएको हो।

गत आर्थिक वर्षको तुलनामा आयात–निर्यात अनुपात घटेको विभागको तथ्यांकले देखाउँछ। गतवर्ष माघ मसान्तसम्ममा १२.३७ रहेको यस्तो अनुपात चालु आर्थिक वर्षको माघसम्ममा ७.०७ प्रतिशतले घटेर ११.४९ कायम भएको छ। यसरी हेर्दा यो अवधिमा मुलुकले गरेको कूल वैदेशिक व्यापारमा आयातको हिस्सा ९२ प्रतिशत र निर्यातको हिस्ता ८ प्रतिशत बराबर रहेको देखिन्छ।

यो अवधिमा विरगंज भन्सार नाकाबाट सबैभन्दा धेरै वैदेशिक व्यापार भएको देखिन्छ। यो नाकाबाट ७ महिना अवधिमा २ खर्ब ५४ अर्ब ९३ करोड रुपैयाँ बराबरको मालवस्तु आयात हुँदा २२ अर्ब ३८ करोड रुपैयाँ बराबरको निर्यात भएको छ।