अस्ट्रेलियन ओपनको सेमिफाइनलमा सेरेना र ओसाका भिड्ने

काठमाडौँ – सेरेना विलियम्स अस्ट्रेलियन ओपनको सेमिफाइनलमा पुगेकी छन् । मंगलबार सम्पन्न क्वाटरफाइनलको खेलमा रोमानियन टेनिस खेलाडी सिमोना हलेपलाई सोझो सेटमा पराजित गर्दै प्रतियोगिताको सेमिफाइनलमा पुगेकी हुन् ।

सेरेनाले सिमोनालाई ६-३, ६-३ को सोझो सेटमा पराजित गरेकी हुन् । अब सेमिफाइनलमा सेरेनाले जापानी टेनिस स्टार नाओमी ओसाकासँग आगामी विहिबार खेल्ने भएकी छन् । ओसाकाले आजै विहान ताइवानकी खेलाडी सिएह सु वीलाई ६-२, ६-२ को सोझो सेटमा पराजित गर्दै सेमिफाइनलमा पुगेकी थिइन् ।

सेरेना र ओसाकाको २०१८ को चर्चित युएस ओपनको फाइनलपछि पहिलो पटक भेट हुदै छ । सो फाइनलमा ओसाकाले सेरेनालाई पराजित गरेर युएस ओपन जित्ने र कुनै पनि सिंगल उपाधि जित्ने पहिलो जापानी खेलाडी बनेकी थिइन् ।