काठमाडौं – नेपाल वायुसेवा निगमको हङहङ उडान पुनः सोमबारदेखि शुरू हुने भएको छ । चौंथो पटकसम्म उडान शुरू गरेर यात्रुमा कोभिड पोजिटिभ देखिएपछि उडानमा प्रतिबन्ध लागेको थियो ।
हङकङ जाने यात्रुले अब ४८ घण्टाभित्रको कोभिड परीक्षणको नेगेटिभ रिपोर्ट पेश गर्नुपर्ने व्यवस्था निगमले गरेको छ । निगमले अन्य गन्तव्यमा ७२ घण्टाको कोभिड परीक्षणको नेगेटिभ रिपोर्टलाई मान्यता दिने गरेको भएपनि हङकङको लागि भने ४८ घण्टाभित्रको मात्रै रिपोर्टलाई अनिवार्य गरेको हो ।
यसअघि ७२ घण्टाको रिपोर्टलाई मान्यता दिँदा हङकङ पुगेपछि कोभिड पोजिटिभ भइसक्ने समस्या बढेकोले एक दिनको समय कम गर्न र कोभिड पोजिटिभ हुने समस्या न्यूनीकरण गर्न खोजिएको निगमकी प्रवक्ता करिश्मा श्रेष्ठले जानकारी दिनुभयो । निगमले सरकारी प्रयोगशालाको मात्रै रिपोर्टलाई मान्यता दिन थालेको थियो ।
तर, पनि कोभिड परीक्षणपछि यात्रुले सचेतना नअपनाएको कारण हङकङ पुगेपछि परीक्षण गर्दा कोभिड पोजिटिभ भएको हुनसक्ने आधारमा ४८ घण्टाभित्रको रिपोर्टलाई मात्रै मान्यता दिने गरेको छ । निगमका अनुसार विगमतमा उडानपूर्वको ७२ घण्टाभित्र जारी कोभिड–१९को परीक्षण गरिएको आरटी(पीसीआर नेगेटिभ प्रमाणपत्र पेश गरी हङकङ गएका केही यात्रुहरूको हङकङस्थित विमानस्थलमा त्यहाँको निकायले परीक्षण गर्दा पोजिटिभ देखिएका थिए ।
सोही कारण निमगले ४८ घण्टाभित्रको रिपोर्ट लिएर गएका यात्रुलाई दुःख नहोस, पोजिटिभ बिरामी पनि नजाउन् र निगमको उडान प्रभावितसमेत नहोउन् भन्ने उद्देश्यले ४८ घण्टा भित्रको स्वाब कलेक्सन गरेको हुनुपर्ने र नेगेटिभ रिपोर्ट भएको प्रमाणपत्र पेश गर्नुपर्ने अनिवार्य व्यवस्था गरेको हो ।
