काठमाडौं – सन् २०१९ मा नेपालको मानव विकास सूचकांक ०.६०२ पुगेको छ । सन् २०१८ मा यो सूचकांक ०-५७९ थियो । संयुक्त राष्ट्रसंघीय विकास कार्यक्रम (यूएनडीपी)ले आज सार्वजनिक गरेको मानव विकास प्रतिवेदन-२०२० अनुसार नेपाल संसारका मध्यम स्तरको मानव विकास भएको देशहरुको सूचीमा छ ।
प्रतिवेदनका अनुसार, संसारका मानव विकासका आधारमा १८९ देशमध्ये नेपालको स्थान १४२औं स्थानमा छ । नेपाल गत वर्ष १४७औं स्थानमा थियो । संसारमा सबैभन्दा धेरै मानव विकास भएको देशको पहिलो स्थानमा नर्वे छ । यसको मानव विकास सूचकांक ०.९५७ छ । मानव विकास सूचकांकको अधिकतम मान १ अंक हो भने न्यूनतम मान ० अंक हो । सूचकांक जति धेरै माथि उक्लियो, उति विकासको अवस्थालाई बुझाउँछ ।
तीन दशकयता औसत आयु, साक्षरता तथा प्रतिव्यक्ति आयमा सुधार भएकाले मानव विकास सूचकांकमा सुधार आएको हो । सन् १९९० मा ५४.४ रहेको औसत आयु अहिले ७०.८ वर्ष पुगेको छ । प्रतिव्यक्ति कुल राष्ट्रिय आय १ हजार ३७२ डलर (सन् २०१७ को पीपीपी मूल्यमा)बाट बढेर ३ हजार ४५७ डलर पुगेको छ ।
