काभ्रेबाट ३८ तोला सुन चोरेर भागेका पाँच जना ठमेलबाट पक्राउ

काठमाडौं – काभ्रेपलाञ्चोकको पाँचखालबाट ३८ तोला सुन चोरेर भागेका पाँच जना काठमाडौको ठमेलबाट पक्राउ परेका छन् । पाँचखालस्थित एक घरबाट शनिबार ३८ तोला सुन चोरी भागेका पाँच जनालाई आइतबार प्रहरीले काठमाडौंको ठमेलबाट पक्राउ गरेको हो ।

पक्राउ पर्नेमा ओखलढुंगाका देवराज दाहाल, सिन्धुपाल्चोकका रामचन्द्र चालिसे, काभ्रेका राम तामाङ, हुँइबहादुर तामाङ र राजन तामाङ रहेको महानगरीय प्रहरी परिसरका प्रवक्ता डीएसपी प्रमेश विष्टले जानकारी दिएका छन् । डीएसपी विष्टले देवराज र रामचन्द्रका साथमा सुन फेला परेको जानकारी दिए ।

पक्राउ परेका पाँचै जनालाई थप अनुसन्धान र कारबाहीका लागि जिल्ला प्रहरी कार्यालय काभ्रेमा पठाइएको पनि डीएसपी विष्टले जानकारी दिएका छन् ।