टोकियो – वायु प्रदूषणको प्रमुख कारण डिजेल-पेट्रोल-ग्यासबाट चल्ने सवारीले फाल्ने धुवाँ हो । यस्ता सवारीको विकल्प विद्युतीय सवारी नै हो । पछिल्लो समय विश्वका सबैजसो सवारी उत्पादक कम्पनीहरुले अर्बौ डलर विद्युतीय सवारी उत्पादन तथा त्यसमा प्रयोग हुने व्याट्री प्रविधिको लागत कम गराउन लगानी गरिरहेका छन् ।
त्यस्तै जापान सरकारले वातावरणमैत्री सवारीलाई उच्च प्राथमिकतामा राखेको छ । सरकारले सन् २०३० कै दशकको मध्यसम्म सबैखाले पेट्रोल/डिजेल सवारीमा प्रतिबन्ध लगाउने योजनामा काम गरिरहेको छ ।
सरकारले विद्युतीय सवारीलाई कसरी प्रोत्साहन गर्न सकिन्छ भन्ने विषयमा कडा मेहनत गर्ने बताइएको छ । जापान सरकारले सन् २०५० सम्म देशको कार्बन प्रदूषण नियन्त्रण गर्ने दाबी गरेको छ । त्यसै अन्तर्गत सरकारले प्रदूषण न्यूनिकरण गर्न विद्युतीय सवारीमात्र प्रयोगमा ल्याउने नीतिको तरखरमा लागेको हो ।
अर्थतन्त्र, व्यापार र उद्योग मन्त्रालयले विद्युतीय सवारीमात्र प्रयोगमा ल्याउने नीतिका लागि गाडी निर्माताका प्रतिनिधिहरुसंग छलफल गर्ने भएको छ । मन्त्रालयका विज्ञहरूको एक समितिले संकलन गरेको प्रतिवेदन पश्चात पेट्रोल/डिजेल कारको बिक्रीमा प्रतिबन्ध लगाउने कार्य योजना बनाइनेछ ।
नयाँ नीति यस वर्षको अन्त्यसम्ममा घोषणा हुन सक्ने आशा गरिएको छ ।
