भारतले नेपाललाई उपलव्ध गरायो २८ वटा आईसीयु भेन्टिलेटर

काठमाडौं – भारतले नेपाललाई २८ आइसीयु भेन्टिलेटर सहयोग गरेको छ । नेपालका लागि भारतीय राजदुत विनयमोहन क्वात्राले स्वास्थ्यमन्त्री भानुभक्त ढकाललाई २८ थान आइसीयु भेन्टिलेटर आइतबार हस्तान्तरण गरेका छन् ।

भारतले कोरोना महामारी नियन्त्रणका लागि गर्ने भनेको सहयोगको निरन्तरतास्वरूप यी भेन्टिलेटर सहयोग गरिएको भारतीय दुताबासले जनाएको छ । भारतले यस अघि सेप्टेम्बर १५ मा रेमडेसिभिर औषधि, अगस्त ९ मा आइसीयु भेन्टिलेटर, मे १७ मा पिसिआर टेस्ट किट र अप्रिल २२ मा विभिन्न औषधि सहयोग गरेको थियो ।

सहयोग हस्तान्तरण गर्दै राजदुत क्वात्राले नेपालको कोरोना महामारी रोक्ने अभियानमा भारतले आवश्यक सहयोग गर्दै जाने प्रतिबद्धता व्यक्त गरेका छन् ।