काठमाडौँ – बहुपक्षीय ऋणदाता विश्व ब्यांकले नेपालको ग्रामीण व्यवसाय तथा आर्थिक विकाससम्बन्धी परियोजनाका लागि ८ करोड डलर (करीब रु. ९ अर्ब ५० करोड) ऋण सहयोग गर्ने भएको छ।
नेपालको कृषि क्षेत्र तथा महामारीपछिको आर्थिक पुनरुत्थानलाई सघाउने यो परियोजनाका लागि ब्यांकले ऋण सहायता अनुमोदन गरेको जारी प्रेस विज्ञप्तिमा उल्लेख छ।
ब्यांकको सहायताको कृषि व्यावसायीकरण तथा व्यापार आयोजनासहितका अरु परियोजनामा व्यापक अनियमितता भएको र ती परियोजनाले लाभ नदिएको तथ्यका बीच ब्यांकले उस्तै खालका परियोजनाका लागि फेरि अर्को ऋण दिन लागेको हो।
यो परियोजनाले ग्रामीण कृषि व्यवसायको बजार पहुँचलाई वृद्धि गर्दै उद्यमशीलता प्रवर्द्धन तथा रोजगारी सिर्जना गर्नेछ। खासगरी महिलाद्वारा सञ्चालित कफी, चिया, फलफूल तथा जडिबुटी लगायत परियोजनालाई सहयोग गरिने ब्यांकले जनाएको छ।
नेपालका लागि ब्यांकको देशीय निर्देशक फारिस हदाद जर्भोसले यो परियोजना मार्फत सरकार र निजी क्षेत्रको सहकार्यमा विश्व बजारमा नेपालको कृषि उत्पादनको ब्राण्ड स्थापित गर्न सहयोग गर्ने उल्लेख गरेका छन्।
नेपालले दुई दर्जन परियोजना सञ्चालन गर्न विश्व ब्यांकसँग करीब ३ अर्ब डलर (करीब रु. साढे तीन खर्ब) ऋण सहयोग लिने समझदारी गरेर काम अगाडि बढाइरहेको छ ।
