काठमाडौँ – ग्यास आपूर्ति सहज गर्न सरकारले आधा सिलिन्डर मात्रै ग्यास भरेर बिक्री गर्ने भएको छ ।
नेपाल आयल निगमले आधा सिलिन्डर मात्रै ग्यास भर्न ग्यास उद्योगहरूलाई परिपत्र गरेको छ ।
पछिल्लो समय ग्यास आपूर्तिमा देखिएको कठिनाइका कारण आधा सिलिन्डर मात्रै भरेर बिक्री गर्न लागिएको निगका कार्यकारी निर्देशक सुरेन्द्रकुमार पौडेलले जानकारी दिए ।
एउटा सिलिन्डरमा १४ केजी २ सय ग्राम ग्यास भरिएको हुन्छ । तर, अब ७ केजी १ सय ग्राम ग्यास मात्रै भरिने कार्यकारी निर्देशक पौडेलले जानकारी दिए ।
उनका अनुसार ग्यासको परिमाण घटेपछि मूल्य पनि घट्नेछ । अब ६ सय ८७ रुपैयाँ ५० पैसामा उक्त आधा भरिएको सिलिन्डर बिक्री हुनेछ ।
