टोकियो – नेपाली युवा किक वक्सिङ खेलाडी अविरल घिमिरेले अहिलेसम्मकै ठूलो सफलता प्राप्त गरेका छन्। उनले आईतवार जापानको राजधानी टोकियोमा आयोजित हिट ४६ किक वक्सिङ्गको उपाधि जितेका हुन् । जुन उनको अहिलेसम्मको ठूलो सफलता हो।
उनले उक्त प्रतिस्पर्धामा जापानी खेलाडी मोरीमोतोलाई पहिलो राउण्डमा नै हराउन सफल भएका थिए। खेलमा सफलता प्राप्तसंगै अविरलले उपस्थित सवैलाई धन्यवाद दिदैं, जापानीहरुलाई नेपाल भ्रमण वर्ष 2020 को अवसरमा नेपाल भ्रमणको निम्ता समेत दिए ।
विगत ५ वर्षदेखि आफ्नो आमावुवासंग जापानको नागोया सहरमा बस्दै आएका २१ वर्षिय अविरल घिमिरेलाई उनको मनपर्ने खेल बक्सिङ्गमा अहिलेसम्म सफलता मात्र हात परेको छ। जापान बसाईको क्रममा उनले ५ वटा आधारभुत र ७ वटा व्यवसायिक खेल खेलिसकेको उनका बुवा तथा उनको बक्सिङ्ग खेलका कोच (प्रशिक्षक) देव धिमिरे बताउछन् । बुवाकै प्रेरणावाट आफु यस खेलमा लागेको अविरलको भनाई छ ।उनका बुवा देव घिमिरे नेपालका मार्शलआर्टका पूर्व राष्ट्रिय खेलाडी समेत हुन्।
अविरलले खेलका ७ वटा व्यवसायिक खेलहरु मध्ये ५ वटामा उनले नकआउट चरणमा नै जित हासिल गरेका थिए भने २ वटा खेल भने बराबरी भएको थियो। जसमा १ खेल उनको पक्षमा आएको थियो भने अर्को १ खेल विपक्षमा गएको थियो। विदेशी भूमिमा आफ्नो छोराले खेलको माध्यमद्वारा नेपालको नाम चिनाउदा आफु मात्र नभई जापानमा बस्ने सबै नेपालीहरुको गर्वको कुरा भएको देव घिमिरेको भनाई छ। ***
