काठमाडौँ – जापानले अघिल्लो महिनाबाट दक्षिण कोरियालाई लक्षित गरी प्राविधिक उपकरणमा आवश्यक पर्ने फोटोरेजिस्ट्स र अन्य उपकरणको निर्यातमा कडाई गरेको थियो । यसबाट आयातमा आधारित दक्षिण कोरियाली अर्थतन्त्रमा नराम्रो असर पर्ने भन्दै दक्षिण कोरियामा तीव्र आक्रोश बढेको छ ।
दक्षिण कोरियालाई अत्याधुनिक प्राविधिक उपकरण निर्यात गर्न कडाई गर्ने जापानको कदमको विरोधमा दक्षिण कोरियाली साना व्यवसायीहरुले जापानी सामानको उपभोग नगर्न आह्वान गरेका छन् ।
जापानी कदमविरुद्ध सोमबार प्रदर्शन गर्दै दक्षिण कोरियाली साना व्यवसायी संघका प्रतिनिधीहरुले मुलुकका व्यवसायीहरुलाई जापानी सामान वहिष्कार गर्न आह्वान गरेका हुन् । उनीहरुले जापानले आफ्नो कदम फिर्ता लिएर माफी नमागेसम्म जापानी सामान बहिष्कार गर्न आह्वान गरे ।
लाखौं दक्षिण कोरियालीले जापानी सामान उपभोग नगर्ने प्रतिबद्धतापत्रमा हस्ताक्षार गरिसकेका छन् । त्यस्तै, अर्को वर्ष जापानको राजधानी टोकियोमा हुने ओलम्पिक दक्षिण कोरियाले बहिष्कार गर्नुपर्ने आवाज पनि उठ्न थालेको बताइएको छ ।
दक्षिण कोरियाले जापानी कदमबारे विश्व व्यापार संगठनमा औपचारिक उजुरी दर्ता गरेको र आगामी साता स्विट्जरल्याण्डको जेनेभामा आयोजना हुन लागेको संगठनको सम्मेलनमा यसबारे छलफल हुने कार्यक्रम छ ।
