टोकियो– फुकुओका सहरको सुमियोसी जिन्ज्या (मन्दीर) को परिसरमा अर्का एक नेपाली युवक माथी छुरा प्रहार गरी हत्या गर्न खोजेको आरोपमा प्रहरीले नेपाली युवकलाई पक्राउ गरेको छ । निप्पोन टेलिभिजनका अनुसार पक्राउ पर्नेमा फुकुओकाको हिगासी कुमा बस्ने जिस्यो सेन्मोन गक्कोमा अध्ययनरत २२ बर्षिय बिनोद बास्तोला रहेका छन् । उनले धारिलो हतियारद्वारा २३ बर्षिय नेपाली बिद्यार्थीमाथी प्रहार गरेर घाइते बनाएको समाचारमा उल्लेख छ ।
सो घटना यहि बिहिबार दिउँसो ५ बजेतिर भएको हो । घाइते अवस्थामा रहेका नेपाली बिद्यार्थीको टाउकोको ३ ठाउंमा गम्भीर चोट लागेको भएपनि उनी चिन्तामुक्त अवस्थामा रहेको समाचारमा उल्लेख छ । पक्राउ परेका बास्तोलाले आफुले मार्ने उदेश्यले आक्रमण नगरेको प्रहरीलाई बयान दिएका छन् ।
प्रहरीका अनुसार ति दुई युवकहरु एक आपसमा चिनजान नभएको तर दुबैजनाको चिनजानको एक युवतीको बिषयलाई लिएर विवाद भई यो घटना घटेको हुनसक्ने बताईएको छ । प्रहरीले यस घटनाको बारेमा थप अनुसन्धान गरिरहेको समाचारमा जनाईएको छ ।
पछिल्लो समयमा नेपालीहरुद्वारा घटाइने यस किसिमका आपराधिक घटनामा बृद्धि हुन थालेको कारण जापानी समाजमा नेपालीहरुलाई हेर्ने दृष्टिकोणमा फरक आउन थालेको महसुस हुन थालेको बताइन्छ ।
भिडियो हेर्नुहोस्