काठमाडौं – भारतमा जारी दृष्टिविहीन विश्वकप ट्वेन्टी ट्वेन्टी क्रिकेटमा नेपालको खराब प्रदर्शन जारी छ । आइतबार भएको खेलमा नेपाललाई श्रीलंकाले १ सय ३१ रनले हराएको छ ।
खेलमा टस जितेर पहिले व्याटिङ गरेको श्रीलंकाले निर्धारित २० ओभरमा दुई विकेट गुमाएर २ सय ७४ रन बनायो । श्रीलंकाको लागि सुरंगा सम्पथले रिटायर्ड हर्ट लिुनुपूर्व १ सय ११ रन जोडे भने रुवन बसन्थाले ७६ रनको योगदान दिए ।
जवाफमा २ सय ७५ रनको विशाल लक्ष्य पछ्याएको नेपालले २० ओभरमा ५ विकेट गुमाएर १ सय ४३ रन मात्रै बनाउन सक्यो । नेपालका लागि कृतन श्रेष्ठ दुवालले अविजित ३७ रन जोड्दा सुनिल थापा मगरले ३८ रनको योगदान दिए ।
जारी प्रतियोगितामा यो नेपालको पाँचौ हार हो । यसअघिका ६ खेलमध्ये नेपाल एक खेलमा मात्रै विजयी भएको छ । नेपालले दक्षिण अफ्रिकालाई हराउँदा अष्ट्रेलिया, पाकिस्तान, बंगलादेश र वेष्ट इन्डिजसँग पराजय भोगेको थियो ।
१० टोली सहभागी प्रतियोगिताको लिग चरणमा शीर्ष चारमा रहने टिम सेमिफाइनलमा पुग्नेछन् ।
