काठमाडौँ – संघीय गठबन्धनको सहिद मञ्चमा जारी रिले अनसनलाई नेपाली काँग्रेसका सभापति तथा पूर्वप्रधानमन्त्री शेरबहादुर देउवाले ऐक्यबद्धता जनाउनुभएको छ । बिहीबार अनसन स्थल खुलामञ्च पुगी जायज माग पुरा गराउन काँग्रेस प्रतिबद्ध रहेको बताउनुभयो ।
‘तपाईँहरूको जायज माग पुरा गराउन नेपाली कांगे्रस पार्टी पूर्ण तयार छ,’ अनसनको विशेष उपस्थिति पुस्तिकामा पूर्व प्रधानमन्त्री देउवाले लेख्नुभएको छ । गठबन्धनको रिले अनसन असार ९ गते सत्रौं दिन पुगेको छ । शान्तिपूर्ण रिले अनसनप्रति गत जेठ २५ गतेदेखि पूर्व प्रधानमन्त्री डा बाबुराम भट्टराई, पूर्व सभामुख दमननाथ ढुंगाना, पूर्व प्रमुख निर्वाचन आयुक्त भोजराज पोखरेल, माधवअधिकारवादी, नागरिक समाजका अगुवाहरू, डाक्टर, प्राध्यापक, शिक्षक, वकिल, पत्रकार, कलाकार, लेखकहरूले ऐक्यबद्धता जनाई सक्नुभएको छ । 
त्यसैगरी, पेशागत सञ्जाल पापड अन्तर्गतका संस्थाहरू नेपाल प्राध्यापक संघ, नेपाल इन्जिनियर्स एशोशियसन, नेपाल मेडिकल एसोसियसन, नेपाल पत्रकार महासंघ, नेपाल बार एसोसियसन, नेपाल शिक्षक महासंघले अनसनस्थल पुगेर ऐक्यबद्धता व्यक्त गरिसकेका छन् । २६ बुँदे माग सहित जेठ २५ गतेदेखि संघीय गठबन्धनले सुरु गरेको तेस्रो चरणको आन्दोलन अन्तर्गतको ‘रिले अनसन’ सत्रौं दिन सफलताका साथ सम्पन्न भएको उल्लेख गर्दै गठबन्धनले प्रेस विज्ञप्ति जारी गरेको छ ।
रिले अनसन असारको मसान्तसम्म जारी रहने समेत गठबन्धनले जनाएको छ ।
