काठमाडौँ – अफगानिस्तानको राजधानी काबुलमा सोमबार बिहान भएको आतंकवादी बम हमलामा परी घाइते भएका नुवाकोटका च्याङ्बा तामाङको उपचारका क्रममा बुधवार निधन भएको छ ।
इस्लामाबादस्थित कार्यवाहक नेपाली राजदूत तीर्थराज अर्यालका अनुसार तामाङको काबुलस्थित मिलिटरी अस्पालमा उपचारकै क्रममा तामाङको बुधवार अपराह्न निधन भएको हो । तामाङको शव सक्दो चाँडो नेपाल ल्याउन पहल भइरहेको परराष्ट्र मन्त्रालय स्रोतले जनाएको छ ।तामाङको शव नेपाल पठाउन हाल काबुलमै रहेका इस्लामाबादस्थित कार्यवाहक नेपाली राजदूत अर्याललाई निर्देशन दिइसकिएको उनले बताए ।
तामाङको निधनसँगै आतंकवादी संगठन तालिबानले काबुलमा गराएको आत्मघाती बम हमलामा मारिने नेपालीको संख्या १३ पुगेको छ । सोमबार बिहान १२ नेपालीसहित अफगानी नागरिक चढेको मिनिबसमा एक तालिबानी आतंककारीले आत्मघाती बम हमला गर्दा १२ नेपालीको ज्यान गएको थियो । उनीहरूको शव बुधबार काठमाडौं ल्याइसकिएको छ ।
कार्यवाहक राजदूत अर्यालले बम हमलामा घाइते भएका अन्य ६ जना नेपालीलाई थप उपचारका लागि बुधबार बिहान नयाँदिल्ली पठाइएको जानकारी दिनुभयो । उनीहरूको नयाँदिल्लीस्थित अपोलो अस्पतालमा उपचार जारी छ ।
