काठमाडौँ – इंग्ल्याण्ड फ्रान्समा जारी युरोकप फुटबलको अन्तिम १६ मा प्रवेश गरेको छ ।
गएराति भएको खेलमा स्लोभाकियासँग गोलरहित बराबरीमा रोकिएसँगै इंल्याण्ड समूह ‘बी’ को उपविजेता बन्दै अन्तिम १६ मा प्रवेश गरेको हो । स्लोभाकियासँग बराबरीमा रोकिएपछि इंल्याण्डले समूह विजेता बन्ने मौका भने गुमायो । खेलमा दुवै टोलीले केही राम्रा मौका पाएपनि गोल गर्न भने सकेनन्। समूह ‘बी’ को अन्तिम लिग खेल अन्तर्गत रुसलाई ३–० ले हराउँदै वेल्सले प्रि क्वाटरफाईनलमा स्थान सुरक्षित गरेको हो ।
खेलमा वेल्सलाई विजयी गराउन आयरन राम्से, निल टेलर र ग्यारेथ बेलले एक एक गोल गरे । यो जितले वेल्सलाई तीन खेलबाट ७ अंकको साथ समूह बी को विजेता बनायो भने १ अंक मात्रै जोडेको रुस समूह चरणबाटै बाहिरियो ।
प्रतियोगिता अन्तर्गत आज राती ४ खेल हुनेछन् । समूह ‘सी’ का अन्तिम लिग खेलहरुमा वेलुकी पौने १० बजे नर्दन आयरल्याण्ड र जर्मनी तथा युक्रेन र पोल्याण्ड भिड्नेछन् । यसैगरी राती पौने १ बजे हुने समूह ‘डि’ का खेलहरुमा क्रोएशिया र स्पेन तथा चेक रिपब्लीक र टर्की भिड्नेछन् ।
