काठमाडौ – अफगानिस्तानको राजधानी काबुलमा आज बिहान भएको आत्मघाती आक्रमणमा १४ नेपालीको मृत्यु भएको पुष्टि भएको छ ।
अन्तर्राष्ट्रिय सञ्चारमाध्यमहरुका अनुसार मृत्यु भएका नेपालीहरू साब्रे सेक्युरिटी कम्पनीमा काम गर्ने कामदारहरु हुन् । उक्त कम्पनीले ती नेपालीलाई क्यानडियन राजदूतावासमा सुरक्षा गर्न खटाएको थियो । विस्फोटमा अन्य सात जना नेपाली घाइते भएका छन् । घटनाको अफगानिस्तान आन्तरिक मामिला मन्त्रालयले पुष्टि गरेको छ ।
जलालावादस्थित क्याम्पमा जानका लागि निस्केको बेला उनीहरू चढेको बसमा आक्रमण भएको थियो। उनीहरू चढेका दुई बस मध्ये आक्रमणकारीले पहिलो बस निस्केपछि दोस्रो बसमा आक्रमण गरेका थिए ।
तालिवानको प्रवक्ता जबिल्लाह मुजाहिदले ट्वीटरमार्फत आक्रमणको जिम्मा लिएका छन् । परराष्ट्र मन्त्रालयले घटनाका बारेमा विस्तृत विवरण आइनसकेको बताएको छ । –एजेन्सी
