काठमाडौं – गजलकार कल्पना पौडेल ‘जिज्ञासु’ ले दोस्रो गजल सङग्रह ‘जून हराएको रात’ लिएर आफ्ना पाठक माझ आउनुभएको छ । नवलपरासी गैडाकोट ४ घर भै हाल मध्यपूर्व इज़रायललाइ आफ्नो कर्म क्षेत्र बनाइ नेपाली साहित्य आकाशलाई माथि उठाउन साधनारत ‘जिज्ञासु’ को दोस्रो गजल सङग्रह ‘जून हराएको रात’ हालै एक समारोहका बिच बिमोचन भएको छ ।
जहाँ नेपाली त्यहाँ नेपाली साहित्यको साधना । दुई बर्ष अघि मात्रै प्रथम गजल सङग्रह ‘भावनाका भेलहरु’ प्रकाशित गर्नुहुने गजलकार ‘जिज्ञासु’ले यति छोटो समयमै दोस्रो गजल संग्रह लिएर आउनुभएको हो ।
गत शनिवार हाम्रो मझेरी साहित्य प्रतिष्ठानको १५ औं बार्षिक उत्सबको अवसरमा ‘जून हराएको रात’ दोस्रो गजल संग्रहको बिमोचन भएको थियो । उक्त गजल संग्रहमा जम्मा १०१ वटा सुन्दर गजलहरु समेटिएका छन् । नेपाली साहित्यलाई जस्तै माया जिज्ञासुले अनाथ बालबालिकालाई पनि गर्नुहुन्छ । उहाँले आफ्नो गजल बिक्रीबाट आएको रकम अत्यन्त निम्न, असहाय विशेष चेपांग बस्तीका बालबच्चाहरुलाई पढाउने हेतुले उहाँ आफैंले खोल्नुभएको परोपकारी संस्था ‘कल्पना फाउन्डेशन’ मार्फत सहयोग गर्नुभएको थियो र, दोस्रो गजल ‘जून हराएको रात’ पुस्तक बिक्रीबाट आएको सम्पूर्ण रकम उहाँ यसै ‘कल्पना फाउन्डेसन’ को कोषमा जम्मा गरि ती अनाथ, असहाय बालबच्चा तथा आफ्नै सन्तानद्वारा अपहेलित भएका बृध्दाहरुको सेवामा समर्पित गर्ने जानकारी दिनुभएको छ ।
गज़ल सङग्रह विमोचन गर्ने क्रममा गजलका शिखर पुरुष डा. घनश्याम न्यौपानेले परिश्रमी साहित्य क्षेत्रका समृध्दी र विकासका लागि एकता तथा सहकार्यको आबश्यकता रहेको जनाउनुभएको थियो । साहित्यकार गोविन्दराज विनोदी लागायत थुप्रै साहित्यकारहरुको राम्रो जमघट रहेको थियो । जातीय विभेद, दुखि गरिब, अनाथ बाल बच्चा, सन्तानले हेला गरेका बृध्दाप्रति सदभाव अनि उनीहरुको लागि केहि गर्ने चाहना व्यक्त गरिएका, नारी चेतना र देशभक्ति भावनाहरु समेटिएको गज़ल सङग्रह ‘जून हराएको रात’ लाई पनि प्रथम गजल सङग्रह ‘भावनाका भेलहरु’ जस्तै प्रिय पाठक माझ प्रिय बन्न सकोस भन्ने विश्वास लिएको गजलकार कल्पना पौडेल जिज्ञासुले बताउनुभयो । ***
