भरतपुर – चितवनका तीनजना गजलकारका छुट्टा छुट्टै तीन कृति शनिबार एक समारोहकाबीच विमोचन भएको छ ।
पुष्प अधिकारी अञ्जलिको ‘वाह ! काठमान्डु’, बिजयराज ज्ञवालीको ‘सिरानीमा जून’ र प्रभाकर पण्डितको ‘समय’ गजल संग्रहको शनिबार भरतपुर-१० मा रहेको महाकालेश्वर मन्दिर नजिकैको सगुन पार्टी प्यालेसमा विमोचन गरिएको हो।
अग्रगामी समाज नेपालको आयोजनामा भएको कार्यक्रममा गजलकार घनश्याम न्यौपाने परिश्रमीले ‘समय’, कान्तिपुर दैनिकका पारसप्रकाश नेपालले ‘वाह ! काठमाडौं’ र राजेन्द्र रिजालले ‘सिरानीमा जुन’ गजल संग्रहको विमोचन गरेका हुन् । विमोचित कृतिका रचनाकार गजलकारले आफ्ना उत्कृष्ट गजल कार्यक्रममा बाचन गरि सुनाएका थिए । 
कार्यक्रममा साहित्यकार धनराज गिरीले पुष्प अधिकारी अञ्जलीको व्यक्तित्व र सृजना, केशबराज आमोदीले ‘सिरानीमा जुन’ गजल संग्रहमा समेटिएका गजल र गोविन्दराज विनोदीले प्रभाकर पण्डितको गजलकारिताका बिषयमा समालोचनात्मक मन्तब्य राखेका थिए ।
कार्यक्रममा साहित्यकार प्रेम विनोद नन्दन, साहित्यकार एलबी क्षेत्री लगायतका साहित्यकारले शुभकामना मन्तब्य राखेका थिए । कार्यक्रममा प्रमुख अतिथि पारसप्रकाश नेपाल, विशिष्ट अतिथि डा. घनश्याम न्यौपाने परिश्रमी लगायतले साहित्य क्षेत्रमा देखिएका विकृतिबारे असन्तुष्टी व्यक्त गर्दै यस्ता प्रबृतिलाई निरुत्साहित गर्नुपर्नेमा जोड दिएकाथिए ।
कार्यक्रम अग्रगामी समाज नेपालका संस्थापक अध्यक्ष राजेन्द्र रिजालको अध्यक्षतामा सम्पन्न भएको थियो ।*** 
